Сваім талентам Святлана Курс назаўсёды ўпісала сваё імя ў беларускую гісторыю — Ціханоўская (дапоўнена)
дададзеныя абзацы 3–8
20 ліпеня, Позірк. Сваімі талентам і працай Святлана Курс “назаўсёды ўпісала сваё імя ў беларускую гісторыю і культуру”, такім чынам дэмакратычны лідар Святлана Ціханоўская адрэагавала на вестку пра смерць пісьменніцы.
“З вялікім болем даведалася пра смерць Святланы Курс. Гэта вялікае гора для блізкіх і сяброў, і вялікая страта для ўсёй Беларусі, — напісала палітык у сваім тэлеграм-канале. — Святлана зараджала беларусаў пазітывам, прыцягвала многіх да беларушчыны, натхняла і заўсёды выпраменьвала аптымізм. Яна была натхненнем для кожнага і кожнай, хто жыў беларускімі справамі, хто любіў Беларусь і рабіў нешта дзеля беларускай справы. Нам будзе вельмі вас не хапаць, Святлана. Вашых словаў, вашых кніг, вашых парадаў і мудрых думак. Светлая памяць”.
Аб’яднаны пераходны кабінет (АПК) адзначыў, што Курс была “не проста беларускай пісьменніцай, якая стала культавай”, але і чалавекам “неверагодных глыбіні і маштабу, носьбітам прыгожай у сваёй кантраверсійнасці беларускасці, абсалютным маральным аўтарытэтам для беларускай інтэлігенцыі”.
“Балюча, што хвароба забрала жыццё ў той, хто ўмела так яго любіць і радавалася нават дробным момантам — і тым, што здарыліся, і тым, што толькі павінныя былі адбыцца, — гаворыцца ў паведамленні АПК. — Святлана давала рады надаць ўсяму беларускаму амаль сакральнае значэнне і прымусіць навакольных ганарыцца і сваёй нацыянальнасцю, і сваёй гісторыяй, і сваім характарам. Пры гэтым яна транслявала збалансаваныя натуральную любоў да навакольных і асцярожнасць там, дзе гэта з’яўляецца пытаннем выжывання і нашага развіцця”.
“Святлана — гэта чалавек, кніг і інтэрв’ю якой ніколі не будзе дастаткова, а яе ўнёсак у беларускую культуру і ў тое, каб беларусы не гублялі аптымізму, складана пераацаніць. Аптымізм — гэта тое, чым мы ёй абавязаныя”, — падкрэсліла палітычная структура, выказаўшы спачуванні сям’і і блізкім пісьменніцы.
Спікер Каардынацыйнай рады (КР) Арцём Брухан ад імя КР таксама выказаў спачуванні родным, блізкім, сябрам і паплечнікам Курс.
“Святлана Курс была пісьменніцай, журналісткай, перакладчыцай і рэдактаркай, чый голас на доўгія гады стаў часткай беларускай культуры і грамадскай думкі, — адзначыў ён. — Пад псеўданімам Ева Вежнавец яна пісала творы, у якіх глыбокія думкі спалучаліся з жывой народнай мовай і непаўторным адчуваннем беларускага Палесся. Яе кнігі, і найперш аповесць “Па што ідзеш, воўча?”, увайшлі ў залаты фонд сучаснай беларускай літаратуры і атрымалі шырокае міжнароднае прызнанне”.
“Праз усё жыццё Святлана заставалася вернай беларускай мове і беларушчыне, адкрыта адстойвала свабоду слова і чалавечую годнасць. Яна, як і многія іншыя, была вымушана пакінуць Беларусь, але і ў эміграцыі не пераставала жыць Беларуссю. Яе слова, яе мова і яе досвед будуць жыць у беларускай культуры і надалей натхняць тых, хто працягвае змаганне за свабодную і дэмакратычную Беларусь”, — падкрэсліў Брухан.
Курс памерла 20 ліпеня ад анкалагічнага захворвання.
У траўні 2025 года за няпоўныя чатыры дні для Курс сабралі амаль удвая больш за запытаную суму на лячэнне захворвання (каля 20 тыс. еўра).
У апісанні збору гаварылася, што ў літаратара дыягнаставаны рак яечніка з метастазамі ў брушыну і лімфатычныя вузлы.
29 лістапада 2025 года Курс заявіла на сустрэчы з чытачамі, што беларусаў на радзіме “паклалі ў зямлю і закаталі катком”.
“Яны ляжаць і трымаюць зямлю над сабой, каб не памерці, і я бачу, што людзі там сціснутыя, як спружына, — сказала літаратар. — З другога боку, я адчуваю, што хутка заззяе беларуская свабода — нашы няшчасці скончацца, а Беларусь стане вялізным лакаматывам развіцця. Гэта будзе як пратуберанец, гэта будзе як выбух”.
Паводле яе слоў, “як толькі атрымаецца перамагчы альбо калі трохі расійскі імперыялізм аслабне і разам з ім аслабне, натуральна, рэжым Аляксандра Лукашэнкі, распростванне спружыны будзе вельмі моцным”.
Святлана Курс пражывала ў Варшаве. Лаўрэат прэміі імя Ежы Гедройца 2021 года за аповесць “Па што ідзеш, воўча?”
Памерла пісьменніца Святлана Курс
20 ліпеня, Позірк. Пра смерць беларускай пісьменніцы Святланы Курс паведаміла 20 ліпеня Беларуская асацыяцыя журналістаў, а таксама знаёмыя аўтара ў сацыяльных сетках. 54-гадовая Курс (Ева Вежнавец) пражывала ў Варшаве. Лаўрэат прэміі імя Ежы Гедройца 2021 года за аповесць "Па што …
Святлана Курс умела ныраць у самыя чорныя прорвы і вынырваць з іх са святлом — Беларускі ПЭН
20 ліпеня, Позірк. Беларускі ПЭН і праваабарончы цэнтр "Вясна" выказалі спачуванні родным і блізкім 54-гадовай пісьменніцы Святланы Курс (Евы Вежнавец), пра смерць якой стала вядома 20 ліпеня. "Света ўмела ныраць у самыя чорныя прорвы і вынырваць з іх са святлом, якое несла …
