Абвешчаны збор сродкаў на пахаванне Святланы Курс

22 ліпеня, Позірк. Збор сродкаў на пахаванне пісьменніцы Святланы Курс абвешчаны на сайце фонду салідарнасці BySol.

Адзначаецца, што “сям’я хоча годна развітацца з чалавекам, які ўсё сваё жыццё прысвяціў беларускай мове, літаратуры і журналістыцы”.

Публічную цырымонію развітання з пісьменніцай плануецца правесці ў Варшаве (месца і час будзе паведамлена пазней). Пасля гэтага, як чакаецца, цела Курс плануюць перавезці ў Беларусь і там пахаваць.

Каб зрабіць гэта магчымым, сям’я ўзяла крэдыт, на пагашэнне якога і адчыняецца збор.

Сума збору складае 6.000 еўра.

Святлана Курс памерла 20 ліпеня ад анкалагічнага захворвання.

У траўні 2025 года за няпоўныя чатыры дні для Курс сабралі амаль удвая больш за запытаную суму на лячэнне захворвання (каля 20 тыс. еўра).

У апісанні збору гаварылася, што ў літаратара дыягнаставаны рак яечніка з метастазамі ў брушыну і лімфатычныя вузлы.

29 лістапада 2025 года Курс заявіла на сустрэчы з чытачамі, што беларусаў на радзіме “паклалі ў зямлю і закаталі катком”.

“Яны ляжаць і трымаюць зямлю над сабой, каб не памерці, і я бачу, што людзі там сціснутыя, як спружына, — сказала літаратар. — З іншага боку, я адчуваю, што хутка заззяе беларуская свабода — нашы няшчасці скончацца, а Беларусь стане вялізным лакаматывам развіцця. Гэта будзе як пратуберанец, гэта будзе як выбух”.

Паводле яе слоў, “як толькі ўдасца перамагчы або калі крыху расійскі імперыялізм аслабне і разам з ім аслабне, натуральна, рэжым Аляксандра Лукашэнкі, выпростванне спружыны будзе вельмі моцным”.

Святлана Курс жыла ў Варшаве. Лаўрэат прэміі імя Ежы Гедройца 2021 года за аповесць “Па што ідзеш, воўча?”