Каардынацыйная рада падтрымала ідэю правядзення круглага стала з удзелам прадстаўнікоў рэжыму Лукашэнкі

31 ліпеня, Позірк. Каардынацыйная рада (КР) паведаміла 31 ліпеня аб прыняцці рэзалюцыі “Аб круглым стале па пераадоленні палітычнага крызісу і ўмацаванні незалежнасці Рэспублікі Беларусь”.

За прыняцце дакумента прагаласавалі 60 дэлегатаў з 71. Супраць выступілі двое, дзевяць устрымаліся.

У рэзалюцыі прызнаецца “наяўнасць зацяжнога глыбокага і сістэмнага ўнутрыпалітычнага крызісу, які ў тым ліку уплывае на міжнародны імідж Беларусі і яе здольнасць да збалансаванага супрацоўніцтва з замежнымі партнёрамі”. “Таксама адзначаецца, што вышэйшай каштоўнасцю з’яўляюцца дзяржаўны суверэнітэт і незалежнасць Беларусі”, — гаворыцца ў паведамленні КР.

Дакументам, у прыватнасці, падтрымана ідэя правядзення круглага стала з удзелам дэмакратычных інстытутаў, уключаючы Каардынацыйную раду, Аб’яднаны пераходны кабінет і Офіс Святланы Ціханоўскай, а таксама прадстаўнікоў “органаў улады Беларусі, якія ажыццяўляюць фактычны кантроль над краінай”. Мэтай дыялогу названыя “пошук выхаду з палітычнага крызісу” і “ўмацаванне незалежнасці Беларусі”.

Адзначаецца, што ініцыятарам падрыхтоўкі рэзалюцыі выступіла фракцыя “Латушка і рух “За Свабоду”.

З ініцыятывай правесці нацыянальны дыялог для мірнага вырашэння глыбокага палітычнага і грамадскага крызісу ў Беларусі Аб’яднаны пераходны кабінет (АПК) афіцыйна выступіў 9 жніўня 2025 года.

У заяве АПК адзначалася, што ў 2021 годзе такую прапанову падтрымала больш за 700 тыс. чалавек, якія прагаласавалі на платформе “Голас”. Кабінет заклікаў арганізаваць круглы стол з удзелам усіх палітычных і грамадскіх сіл.

Рэжым Аляксандра Лукашэнкі адхіляе магчымасць якіх бы там ні было перамоваў у дэмсіламі ў выгнанні. Замест гэтага ўлады ў Мінску спрабуюць усяляк пераследаваць палітыкаў і актывістаў за мяжой — распачынаюць усе новыя крымінальныя справы, ціснуць на сваякоў, якія застаюцца ў Беларусі, адбіраюць нерухомасць і інш.