Намеснікі міністраў замежных спраў Беларусі і РФ ацанілі адносіны з “некаторымі заходнімі структурамі”

11 жніўня, Позірк. “Падыходы да выбудоўвання адносін з некаторымі заходнімі міжнароднымі структурамі” ацанілі намеснік міністра замежных спраў Ігар Сякрэта і яго калега з МЗС РФ Сяргей Рабкоў падчас беларуска-расійскіх міжведамасных кансультацый у Маскве 11 жніўня.

Прэс-службы ведамстваў паведамляюць, што бакі абмеркавалі шырокі спектр супрацоўніцтва Беларусі і Расіі па супрацьстаянні “юрыдычнай агрэсіі“, узаемнай падтрымцы ў сферы міжнароднага правасуддзя, рэалізацыі заключаных паміж краінамі дагавораў і дакументаў па гэтых пытаннях.

Удзельнікі кансультацый абмяняліся думкамі аб “сітуацыі ў рэгіёне і свеце, падыходах да актуальных пытанняў шматбаковага парадку дня”.

Расійскае МЗС асобна падкрэслівае, што сустрэча адбылася “ў традыцыйна давернай атмасферы“, бакі “ў духу саюзніцтва зверылі гадзіннікі“.

“Пацверджаны настрой на працяг цеснай каардынацыі і актыўных сумесных намаганняў па адстойванні агульных інтарэсаў на міжнароднай арэне“, — адзначае расійскае ведамства.

Адметна, што дакладна такія ж выразы пра “зверку гадзіннікаў“ і “юрыдычную агрэсію“ выкарыстоўваліся ў анонсе візіту міністра замежных спраў РФ Сяргея Лаўрова ў Беларусь 14–15 чэрвеня.

МЗС РФ заяўляў, што Беларусь з’яўляецца “найбліжэйшым саюзнікам і стратэгічным партнёрам“ Расіі. Краіны, як сцвярджалася, звязваюць“шматгадовыя традыцыі дружбы і ўзаемадапамогі, культурная і духоўная супольнасць, сумеснае гістарычнае мінулае і арыенціры на будучыню”.

Расійскае знешнепалітычнае ведамства лічыць, што адносіны Масквы і Мінска могуць служыць “узорам выбудоўвання раўнапраўнага і ўзаемавыгаднага міждзяржаўнага супрацоўніцтва“, а ўзровень узаемадзеяння ў рамках Саюзнай дзяржавы — “арыенцірам для іншых інтэграцыйных аб’яднанняў на еўразійскай прасторы“.

24 лютага 2022 года РФ пачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Лукашэнкі прадаставіў войску РФ тэрыторыю для нападу на суседнюю краіну ўзімку і ўвесну 2022 года, а затым цягам многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследвальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.

Гл. таксама:

Кіраўнік МЗС РФ у Дзень незалежнасці Беларусі заклікаў “згуртавацца і даць адпор” замахам на Саюзную дзяржаву

СК РФ абвінаваціў украінскіх ваеначальнікаў ва ўдары па аўтобусе з беларускімі дзецьмі ў Бранскай вобласці