Былы дырэктар мясакамбіната “Белавежскі” атрымаў 1,2 млн рублёў хабараў у токенах — Генпракуратура

12 жніўня, Позірк. Крымінальная справа аб карупцыі былога дырэктара мясакамбіната ААТ “Белавежскі” для вызначэння падсуднасці накіраваная ў Мінскі гарадскі суд, паведамляе Генеральная пракуратура.

Фігурант абвінавачваецца паводле арт. 430 Крымінальнага кодэкса (атрыманне хабару).

Таксама ў суд для вызначэння падсуднасці накіраваная справа аб дачы хабару (арт. 431 КК) у дачыненні да хабарадавальніка.

Згодна з матэрыяламі справы, былы кіраўнік сельскагаспадарчай арганізацыі са жніўня 2024 года па ліпень 2025-га прыняў для сябе ад прадстаўніка пяці камерцыйных арганізацый у якасці хабару 365.030 токенаў USDT (Tether USD) TRC20, што эквівалентна 365.030 доларам ЗША, або амаль 1,2 млн рублёў (у пераліку па тагачасных курсах, цяпер гэта 1,08 млн рублёў). Лічбавыя актывы з дапамогай іншай асобы пералічваліся службовай асобе на яго крыптагаманец.

Хабар атрыманы абвінавачаным за арганізацыю бесперабойнай пастаўкі мясной прадукцыі ў аб’ёмах, неабходных суб’ектам гаспадарання, якія прадстаўляюцца хабарадавальнікам. Маёмасная выгада таксама перадавалася за набыццё прадпрыемствам АПК у іх пшаніцы.

“Абвінавачаныя далі прызнальныя паказанні пра абставіны ўчыненых злачынстваў, чыстасардэчна раскаяліся ў зробленым. Хабараатрымальнікам прыняты меры па выплаце даходу, атрыманага злачынным шляхам”, — адзначае Генпракуратура.

Раней ужытая да абвінавачаных мера стрымання ў выглядзе заключэння пад варту пакінутая ў моцы.

24 студзеня 2023 года прэс-служба Брэсцкага абласнога суда паведаміла, што суд Камянецкага раёна вынес прыгавор па крымінальнай справе аб хабарах у дачыненні да былога намесніка генеральнага дырэктара ААТ “Белавежскі“. Ён быў асуджаны на 4,5 года пазбаўлення волі з адбываннем пакарання ў папраўчай калоніі ва ўмовах узмоцненага рэжыму са штрафам у памеры 500 базавых велічынь (18.500 рублёў) і пазбаўленнем на 5 гадоў права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў.

Паводле абвінавачання, фігурант атрымаў хабар у памеры 4 тыс. долараў і 24 тыс. рублёў.

За першыя шэсць месяцаў 2026 года на 12,5% павялічылася колькасць асуджаных за карупцыйныя злачынствы ў параўнанні з аналагічным перыядам 2025-га, вынікае са статыстыкі Вярхоўнага суда. Усяго за гэты перыяд за карупцыю асуджана 342 чалавекі (у студзені — чэрвені 2025 года — 304).

Найчасцей прысуды выносіліся па справах аб хабарах (арт. 430 КК) — 150 (93), за атрыманне хабару асуджаны 21 чалавек (12).

Аляксандр Лукашэнка прыйшоў да ўлады ў 1994 годзе шмат у чым дзякуючы вобразу змагара з карупцыяй і працягвае выкарыстоўваць гэтую тэму. За больш чым 30 гадоў карупцыя так і не была пераможаная.