Кампенсацыя выдаткаў на ўдзел беларускіх суб’ектаў гаспадарання ў замежных выставах вырасце ўдвая

20 жніўня, Позірк. З 250 да 500 базавых велічынь (з 11.250 да 22.500 рублёў) вырасце максімальны памер кампенсацыі выдаткаў на ўдзел беларускіх суб’ектаў гаспадарання ў замежных выставах.

Гэта прадугледжана ўказам “Аб стымуляванні ўдзелу ў міжнародных спецыялізаваных выставах (кірмашах)”, які падпісаў 20 жніўня Аляксандр Лукашэнка. Дакумент уносіць карэкціроўкі ва ўказ ад 14 лістапада 2019 года “Аб падтрымцы экспарту“.

“Акрамя таго, кратнасць гэтых кампенсацый павялічваецца з адной да дзвюх пры ўдзеле ў такіх выставах (кірмашах) у розных краінах“, — адзначае прэс-служба Лукашэнкі.

Падкрэсліваецца, што “навацыі ўказа накіраваныя на пашырэнне рынкаў збыту айчынных тавараў і магчымасцяў для ўдзелу беларускіх экспарцёраў у міжнародных спецыялізаваных выставах”.