Урад не раскрывае, які рост ВУП плануе на 2027 год

28 жніўня, Позірк. Урад не раскрывае, які рост ВУП плануе пры падрыхтоўцы прагнозных дакументаў на 2027 год, вынікае з публікацыі на сайце газеты Адміністрацыі прэзідэнта “СБ. Беларусь сегодня”.

Са спасылкай на міністра эканомікі Юрыя Чабатара 27 жніўня выданне паведаміла, што “ў наступным годзе плануецца рост даходаў на 3%, экспарту — на 2,9%, інвестыцый — на 3,1%”: “Інфляцыя не перавысіць 6%. Як вынік, ВУП складзе каля 360 млрд рублёў”.

Верагодна, маюцца на ўвазе рэальныя наяўныя даходы насельніцтва. Меркаваная дынаміка ВУП не прыведзеная.

У поўнай версіі інтэрв’ю міністра, апублікаванай 28 жніўня, згаданая інфармацыя адсутнічае.

Паводле слоў чыноўніка, прагнозныя параметры разлічваліся “праз прызму балансу знешніх умоў і ўнутраных рэсурсаў”.

У сувязі з гэтым ён адзначыў, што знешнія ўмовы істотна пагоршыліся: “Рост сусветнай эканомікі запаволіўся да 2,7–3,2%. Мінэканамразвіцця Расіі знізіла свае ацэнкі ўдвая — да 1,4%, Кітай — з 4,7 да 4,1%. Эканамічны рост краін далёкай дугі, з якімі актыўна пашыраем узаемадзеянне, таксама прагназуецца ніжэйшым, чым летась”.

Кан’юнктура сыравінных цэн “хоць і застаецца ў цэлым прымальнай, аднак ускладненая геапалітычнай нестабільнасцю і лагістычнымі шокамі”, сказаў кіраўнік Мінэканомікі.

Па выніках 2025 года ВУП Беларусі ў бягучых цэнах склаў 286,7 млрд рублёў (рост на 1,3% пры афіцыйным прагнозе 4,1%). Паказчык Чабатар раней называў гістарычным максімумам.

Афіцыйным (дэ-факта планавым) паказчыкам росту ВУП на бягучы год з’яўляецца +2,8%. Такім чынам, улады чакаюць, што па выніках года ВУП складзе каля 295 млрд рублёў.

Праекты прагнозу сацыяльна-эканамічнага развіцця, мэтавых паказчыкаў грашова-крэдытнай палітыкі і рэспубліканскага бюджэту на 2027 год разглядаліся Саўмінам 19 жніўня. Падрабязнасці не прыводзіліся.