У каналізацыйнай шахце загінула тры работнікі водаканала Калінкавічаў

2 верасня, Позірк. 44-гадовы начальнік участка і два слесары (43 і 37 гадоў) прадпрыемства “Калінкавічыводаканал“ загінулі ў каналізацыйнай шахце, паведаміў Следчы камітэт.

Надзвычайнае здарэнне адбылося 1 верасня. Паводле папярэдніх даных, брыгада “праводзіла планавыя работы па абслугоўванні каналізацыйна-помпавай станцыі“ — чысціла ад бытавога смецця размешчаныя ў шахце са сцёкавымі водамі “кошыкі-пасткі”.

Праз некаторы час супрацоўнікі перасталі выходзіць на сувязь. Калега, які прыехаў, выявіў у памяшканні іх асабістыя рэчы, у калодзежы — ліхтарык, які плаваў. Ён далажыў аб тым, што здарылася, кіраўніцтву, якое выклікала МНС. Супрацоўнікі ведамства, якія прыбылі, дасталі з каналізацыйнай шахты целы трох мужчын.

Следча-аператыўная група ўпраўлення СК па Гомельскай вобласці акрамя агляду аб’екта ўзяла пробы паветра і ўзоры сцёкавых вод. Канфіскавана дакументацыя па ахове працы і тэхніцы бяспекі.