Ціханоўская ў Берліне: Беларусь не безнадзейная справа, падтрымка Германіі сапраўды велізарная

4 лістапада, Позірк. “Беларусы павінны бачыць, што Еўропа — гэта не далёкая мара, а рэальная альтэрнатыва “рускаму свету”, — заявіла дэмакратычны лідар Святлана Ціханоўская на міжнародным форуме Berlin Belarus Future Forum у сталіцы ФРГ 3 лістапада.

Паводле слоў палітыка, якія прыводзіць яе прэс-служба, еўрапейскія партнёры ўжо сёння павінны рыхтавацца да дэмакратычных пераменаў у Беларусі, “распрацоўваць канкрэтныя планы еўрапейскай інтэграцыі і захоўваць падтрымку беларускага грамадства”.

“Мы распрацавалі планы рэформаў <…>. Таму, калі надыдзе момант, Беларусь павінна быць гатовая. І Еўропа таксама павінна быць гатовая”, — сказала дэмлідар, заклікаўшы ўмацоўваць праеўрапейскія настроі грамадстве “шляхам выдачы віз, падтрымкі праграм мабільнасці, адукацыі, культуры”.

“Беларусь — гэта не безнадзейная справа. Беларусь — гэта не Расія, а беларусы — гэта не [Аляксандр] Лукашэнка“, — дадала яна.

Берлін, на думку палітыка, сведчыць, што “нават самыя моцныя сцены могуць упасці, што дыктатуры не вечныя”.

“Падтрымка, якую Германія надае нам на працягу ўсіх гэтых гадоў, сапраўды велізарная, — заявіла Ціханоўская. — З 2020 года мы разам мабілізавалі падтрымку для беларускіх студэнтаў, даследчыкаў, дзеячаў мастацтва, журналістаў, праваабаронцаў і тых, хто пацярпеў ад рэпрэсій. Тысячы беларусаў атрымалі магчымасць працягнуць навучанне і працу тут“.

Дэмлідар падзякавала Бундэстагу і праваабарончай арганізацыі Libereco за тое, што сумесна з імі “атрымалася вывесці пытанне пра палітвязняў на пярэдні план еўрапейскага парадку дня“: “Сёння яно займае цэнтральнае месца практычна ў любой дыскусіі пра Беларусь“.

Ціханоўская адзначыла дыпламатычныя намаганні ЗША ў гэтым кірунку, аднак падкрэсліла, што “гэта было б немагчыма без шматгадовага ціску з боку Еўропы і санкцый“: “І Германія на працягу ўсіх гэтых гадоў займала цвёрдую пазіцыю. Сёння мы павінны памятаць, што 900 палітвязняў* усё яшчэ застаюцца за кратамі. Іх катуюць, трымаюць у ізаляцыі, падвяргаюць пакаранням, а кожны тыдзень з’яўляюцца новыя закладнікі. Мы павінны працягваць барацьбу за іх вызваленне. Але, што яшчэ важней, мы павінны пакласці канец самой сістэме, праз якую людзі аказваюцца ў турмах“.

На думку Ціханоўскай, беларускае пытанне павінна быць уключанае ў мірныя перамовы па Украіне, “каб гарантаваць сыход Расіі не толькі [адтуль], але і з Беларусі, уключаючы вывад яе войскаў і ядзернай зброі“.

Мерапрыемства было арганізаванае фондамі Генрыха Бёля, Конрада Адэнаўэра, Фрыдрыха Эберта і Фрыдрыха Наўмана ў партнёрстве з беларускай супольнасцю RAZAM, ініцыятывай Science at Risk і Libereco. Сярод удзельнікаў былі нобелеўскі лаўрэат Алесь Бяляцкі, экс-палітвязень Марыя Калеснікава, прадстаўнікі ўрада і парламента ФРГ, палітыкі і эксперты.

Папярэдні раз Ціханоўская наведвала Берлін у красавіку, узяўшы ўдзел у міжнароднай дыскусіі “Абарона тых, хто знаходзіцца на перадавой дэмакратыі: супрацьдзеянне, стрымліванне і аднаўленне пасля транснацыянальных рэпрэсій аўтарытарных рэжымаў”.

Паводле інфармацыі яе прэс-службы, наступны раз дэмлідар будзе ў сталіцы Нямеччыны 9 лістапада, дзе выступіць на форуме “Свабода і бяспека: жаночы саміт“ у рамках “Берлінскага тыдня свабоды“. У гэты дзень будзе адзначацца 37-я гадавіна падзення Берлінскай сцяны.

* Паводле звестак праваабарончага цэнтра “Вясна”, на вечар 3 лістапада палітвязнямі ў Беларусі прызнана 885 чалавек.