Мінск і Масква спрабуюць выставіць Польшчу пагрозай бяспецы Украіны, Беларусі і РФ

19 жніўня, Позірк. Масква пры падтрымцы Мінска “паслядоўна праводзіць інфармацыйную аперацыю” па замацаванні за Польшчай ілжывага вобраза краіны, “якая пагражае бяспецы Украіны, Беларусі, РФ і згуртаванасці Захаду”, лічыць дзяржсакратар канцылярыі польскага прэм’ер-міністра і намеснік каардынатара спецслужбаў Станіслаў Жарын.

У справаздачы, якую чыноўнік апублікаваў 19 жніўня ў “Твітары”, гаворыцца, што ў рамках гэтай дзейнасці распаўсюджваецца “хлусня пра нібыта існуючыя планы акупацыі Заходняй Украіны”.

“Умацаванне Польшчай абароннага патэнцыялу і перамяшчэнне Узброеных сіл на ўсход краіны падаюцца як сведчанне агрэсіўных планаў Польшчы ў дачыненні да Беларусі і Расіі. Мэта — паказаць Польшчу пагрозай у рэгіёне”, — падкрэсліў Жарын.

Ён адзначыў, што “ў распаўсюдзе гэтай дэзінфармацыі зноў удзельнічалі самыя высокапастаўленыя прадстаўнікі абодвух рэжымаў”, у прыватнасці з расійскага боку — міністр абароны Сяргей Шайгу, з беларускага — Аляксандр Лукашэнка. “Асабісты ўдзел высокапастаўленых агентаў прапаганды РФ і Беларусі ў антыпольскай дзейнасці стаў нормай”, — канстатаваў чыноўнік.

Мінск і Масква, звярнуў увагу ён, працягваюць сеяць страх наконт прысутнасці ў Беларусі наймітаў ПВК “Вагнер”, распаўсюджваючы ідэю, што вагнераўцы могуць напасці на Польшчу, Літву і Латвію, “дыскрэдытуючы абараназдольнасць Польшчы і НАТО”.

Расійская прапаганда, адзначыў Жарын, выпінае адмыслова падабраную негатыўную інфармацыю пра польска-ўкраінскія стасункі, сярод іншага спрабуючы паказаць, што Украіна нібыта ізаляваная, а яе супрацоўніцтва з Захадам пацярпела крах.