Мінюст Украіны зарэгістраваў грамадскае аб’яднанне “Пагоня” на чале з кікбаксёрам Віталем Гурковым

21 лістапада, BPN. Міністэрства юстыцыі Украіны зарэгістравала грамадскае аб’яднанне “Пагоня”. Заснавальнікамі аб’яднання выступілі беларусы, якія стала пражываюць ва Украіне, а таксама байцы беларускага палка “Пагоня”. Дырэктарам аб’яднання прызначаны беларускі спартсмен, шматразовы чэмпіён свету па тайскім боксе і кікбоксінгу Віталь Гуркоў.

“Мэтай стварэння грамадскага аб’яднання “Пагоня” з’яўляецца падтрымка беларускага дабраахвотніцкага руху ва Украіне, а таксама кансалідацыя беларускай дыяспары для вызвалення Украіны і Беларусі ад расейскіх акупантаў і злачыннай дыктатуры лукашенкі (так у арыгінале. — BPN.)”, — паведамляе аднайменны полк.

Адзначаецца, што ў хуткім часе аб’яднанне абвесціць працэдуру ўступлення ў свой склад, а таксама накіруе вітальныя лісты партнёрам і запрашэнне да супрацы.

Гуркоў уваходзіць у склад Свабоднага аб’яднання спартсменаў Беларусі, якое дзейнічае за мяжой. У кастрычніку яно запісала зварот, у якім заклікала беларускую армію не ўдзельнічаць у вайне Расіі супраць Украіны.