Служба дзяржбяспекі Латвіі заклікала грамадзян не ездзіць у Беларусь і Расію на зімовыя святы

22 снежня, BPN. Служба дзяржаўнай бяспекі (СДБ) заклікала грамадзян Латвіі не ездзіць у Беларусь і Расію на зімовыя святы праз “існыя рызыкі бяспекі ў рэгіёне” ў сувязі з развязанай Крамлём вайной супраць Украіны, а таксама “агрэсіўнай рыторыкай” РФ у адносінах да Латвіі.

У СДБ нагадалі, што спецслужбы Мінска і Масквы “часцей за ўсё спрабуюць завербаваць грамадзян Латвіі непасрэдна на тэрыторыі сваіх краін”.

“Першы кантакт найчасцей адбываецца на мяжы, калі прадстаўнікі спецслужбаў выдаюць сябе за пагранічнікаў, але могуць выдаць сябе за прадстаўнікоў сілавых структур, любых іншых дзяржаўных ці муніцыпальных устаноў”, — адзначылі ў СДБ.

Латвійская спецслужба рэкамендуе грамадзянам “быць асцярожнымі” пры кантактах з любымі расійскімі і беларускімі дзяржаўнымі ўстановамі, а таксама асобамі, якія працуюць на дзяржпрадпрыемствах, ВНУ, навукова-даследчых інстытутах і сферы высокіх тэхналогій.

Раней прадстаўнікі СДБ заяўлялі, што расійскія і беларускія спецслужбы “заўсёды былі зацікаўлены ў вярбоўцы латвійскіх дзяржаўных і муніцыпальных чыноўнікаў, у распараджэнні якіх ёсць інфармацыя, якая ўтрымлівае дзяржтаямніцу, або іншыя звесткі, даступныя для абмежаванага кола асоб”. Яны папрасіла грамадзян паведамляць, калі на мяжы іх “абшукваюць і распытваюць больш звычайнага”, а таксама, калі задаюцца пытанні, не звязаныя з перасячэннем мяжы: пра стаўленне да сітуацыі ва Украіне або абстаноўку ў Латвіі, месца працы, пасаду і зарплату. Асаблівую ўвагу СДБ раіць звяртаць на пытанні, калі “задаюць не пагранічнікі, а людзі ў цывільным”.

Увесну Беларусь увяла бязвізавы рэжым уезду для грамадзян Літвы і Латвіі, улетку — для грамадзян Польшчы. 21 снежня бязвіз падоўжылі на ўвесь 2023 год.

Улады гэтых краін заклікалі суайчыннікаў не наведваць Беларусь з меркаванняў бяспекі.