Пасол ЗША пры АБСЕ: Беларусь груба патурае вайне Расіі

30 сакавіка, BPN. Беларусь “груба патурае вайне Расіі супраць Украіны і яе дэстабілізуючым паводзінам у рэгіёне АБСЕ”, заявіў 29 сакавіка на Форуме па супрацоўніцтве ў галіне бяспекі АБСЕ ў Вене пасол ЗША пры арганізацыі Майкл Карпентар.

У заключнай заяве для форуму Карпентар нагадаў аб тым, што беларускі бок, гаворачы аб вайне, якой “свядома садзейнічаў”, раней паўтараў “ілжывыя заявы аб вучэннях”.

“Літаральна ў мінулыя выходныя Пуцін прыняў надзвычай эскалацыйнае і безадказнае рашэнне аб размяшчэнні ядзернай зброі ў Беларусі”, — зазначыў Карпентар.

Ён падкрэсліў, што АБСЕ не паступае сваімі асноватворнымі прынцыпамі і працягвае прыцягваць да адказнасці за агрэсію супраць Украіны не толькі Расію, але і “Беларусь за яе саўдзел у гэтай вайне”.

Форум па супрацоўніцтве ў галіне бяспекі АБСЕ працуе над павышэннем бяспекі і стабільнасці ў ваеннай сферы ў Еўропе і ахоплівае некаторыя з найбольш фундаментальных ваенна-палітычных пагадненняў дзяржаў — удзельніц АБСЕ.

Прэзідэнт Расіі Уладзімір Пуцін у інтэрв’ю тэлеканалу “Расія 24”, паказаным 25 сакавіка, заявіў, што да 1 ліпеня на тэрыторыі Беларусі будзе завершана будаўніцтва спецыяльнага сховішча для тактычнай ядзернай зброі.

24 лютага 2022 года Расія пачала поўнамаштабную ваенную агрэсію супраць Украіны. Улады ў Мінску пастаянна адмаўляюць удзел беларускай арміі ў баявых дзеяннях на баку РФ, у той жа час тэрыторыя Беларусі з пачатку ўварвання, а таксама ў асобныя перыяды пазней актыўна выкарыстоўвалася расійскай арміяй для нанясення ўдараў па Украіне.

Летась у ліпені Аляксандар Лукашэнка публічна прызнаў уварванне 20-тысячнага кантынгенту расійскіх войскаў з тэрыторыі Беларусі. У цэлым ён неаднаразова заяўляў, што Беларусь удзельнічае ў вайне, усяляк падтрымліваючы Расію, але “нікога не забіваючы”.