Еўрапейскі суд адмовіўся здымаць санкцыі з кампаніі Dana Astra

29 чэрвеня, BPN. Еўрапейскі суд у Люксембургу 28 чэрвеня адмовіўся здымаць санкцыі з зарэгістраванай у Мінску будаўнічай кампаніі Dana Astra.

Згодна з рашэннем суда, кампанія застанецца ў санкцыйным спісе як тая, што падтрымлівае рэжым Аляксандра Лукашэнкі і атрымлівае выгады ад гэтага.

Заяўнік у іску ўказваў на памылковасць сцвярджэння аб залежнасці эканамічнага поспеху кампаній, якія працуюць у Беларусі, ад іх сувязі з рэжымам Лукашэнкі.

Суд, у сваю чаргу, зазначыў, што, “улічваючы дзелавое асяроддзе і эканамічную рэальнасць у Беларусі”, аперацыі “такога маштабу, як тыя, якія праводзіў заяўнік”, “немагчымыя без адабрэння рэжыму Лукашэнкі”. Акрамя таго, “перавагі, атрыманыя заяўнікам, былі закліканы аблегчыць рэалізацыю маштабнага будаўнічага праекта, які меў асаблівае значэнне для рэжыму”.

“Пры рэжыме Лукашэнкі беларуская эканоміка характарызуецца кантролем, які ён ажыццяўляе як над дзяржаўным, так і над прыватным сектарам”, — падкрэсліў суд, адхіляючы іск.

“Дана Холдынгс/Дана Астра” — адзін з асноўных дэвелапераў і забудоўшчыкаў у Беларусі. Кампанія атрымала зямельныя ўчасткі для забудовы некалькіх буйных жылых комплексаў і бізнес-цэнтраў. Уладальнікі Dana Holdings/Dana Astra падтрымліваюць цесныя адносіны з Аляксандрам Лукашэнкам. Лілія Лукашэнка, нявестка прэзідэнта, займае ў кампаніі высокую пасаду. Такім чынам, Dana Holdings/Dana Astra атрымлівае выгаду з рэжыму [прэзідэнта Лукашэнкі] і падтрымлівае яго”, — гаворыцца ў дакуменце.

Кампанія Dana Holdins (“Дана Холдынгс/Дана Астра”) кантралюецца братамі Багалюбам і Драгамірам Карычамі, сербскімі бізнесменамі. Багалюб Карыч у 2022 годзе трапіў у санкцыйны спіс ЕС.

Восенню 2020 года выданне EU Observer апублікавала расследаванне аб маёмасных сувязях Dana Holdnigs з сынам Аляксандра Лукашэнкі Віктарам і яго жонкай Ліліяй Лукашэнка праз кіпрскія афшорныя кампаніі.

17 снежня 2020 года Савет ЕС унёс кампанію ў санкцыйны спіс. Пазней яна патрапіла пад санкцыі Вялікабрытаніі, Швейцарыі, Албаніі, Ісландыі, Ліхтэнштэйна, Нарвегіі, Паўночнай Македоніі, Чарнагорыі, якія далучыліся да новых пакетаў санкцый.

У сакавіку 2023 года Dana Holdings/Dana Astra патрапіла ў санкцыйны спіс Японіі.

Еўрапейскі суд раней адмовіўся выключаць з санкцыйнага спісу дэпутатаў Палаты прадстаўнікоў Святланы Любецкай, Аляксандра Амельянюка, Алега Гайдукевіча (таксама ўзначальвае Ліберальна-дэмакратычную партыю) і намесніка старшыні Белтэлерадыёкампаніі Сяргея Гусачэнкі.

Пазней былі адхіленыя іскі Аляксандра Бахановіча, Сяргея Рубніковіча і Сяргея Скрыбы, якія былі ўключаны ў санкцыйны спіс Еўрасаюза за дачыненне да рэпрэсій супраць беларускіх студэнтаў.