Канада ўводзіць дадатковыя санкцыі супраць рэжыму Лукашэнкі

9 жніўня, Позірк. Канада “ў адказ на працяг грубых і сістэматычных парушэнняў правоў чалавека, якія адбываюцца ў Беларусі” пашырыла санкцыі супраць рэжыму Аляксандра Лукашэнкі, паведамляе МЗС гэтай краіны.

Санкцыі супраць 9 фізічных і 7 юрыдычных асоб уводзяцца таксама супраць тых, хто мае дачыненне да “працягу парушэнняў Расіяй суверэнітэту і тэрытарыяльнай цэласнасці Украіны, часткова праз Беларусь і пры падтрымцы Беларусі”.

Пад санкцыі патрапілі чыноўнікі, суддзі і прапагандысты, у тым ліку кіраўнік Белтэлерадыёкампаніі Іван Эйсмант. Пашырэнне санкцый таксама “накіравана на Міністэрства абароны Беларусі, унутраныя войскі Міністэрства ўнутраных спраў Беларусі, а таксама ваенна-вытворчыя і тэхналагічныя кампаніі”.

Канада “самым рашучым чынам” асуджае падтрымку беларускім рэжымам уварвання Уладзіміра Пуціна ва Украіну. “Мы заклікаем Лукашэнку неадкладна адмовіцца ад падтрымкі агрэсіўнай вайны Расіі супраць Украіны”, — падкрэсліваецца ў заяве.

“Сённяшнія санкцыі ўводзяцца паралельна з аналагічнымі дзеяннямі саюзнікаў, у тым ліку Еўрапейскага саюза, ЗША, Вялікабрытаніі і Новай Зеландыі. Канада будзе працягваць працаваць са сваімі партнёрамі, каб галасы народа Беларусі былі пачутыя”, — падкрэсліў МЗС Канады.

9 жніўня ЗША пашырылі санкцыі супраць беларускага рэжыму “ў сувязі з трэцяй гадавінай сфальсіфікаваных прэзідэнцкіх выбараў у жніўні 2020 года”. У санкцыйны спіс унесены авіякампанія “Белавія”, Дэпартамент фінансавых расследаванняў Камітэта дзяржаўнага кантролю (ДФР КДК), Беларускі металургічны завод (БМЗ), ТАА “БелКапСтыл” (амерыканскі дылер БМЗ), Мінскі завод грамадзянскай авіяцыі.

Увайшлі ў спіс фізічныя асобы: сыны і жонка бізнесмена Аляксея Алексіна Дзмітрый, Віталь і Іна, а таксама дырэктар ДФР КДК Ігар Маршалаў, яго намеснікі Дзмітрый Францкевіч, Ігар Сяліцкі, старшы інспектар па асабліва важных справах ДФР Арцём Дунько. Акрамя таго, санкцыі ўведзены супраць гендырэктара БМЗ Дзмітрыя Корчыка.