Сусветны банк павысіў з 0,6 да 3% прагноз росту ВУП Беларусі па выніках 2023 года

5 кастрычніка, Позірк. Рост ВУП Беларусі па выніках 2023 года складзе каля 3%, поўнае аднаўленне пасля спаду 2022 года прагназуецца да 2024–2025 гадоў, гаворыцца ў восеньскім аглядзе Сусветнага банка.

Паводле прагнозу экспертаў, па выніках 2024 года рост ВУП Беларусі складзе 0,8%, 2025-га — 0,7%.

“Пасля самага рэзкага за апошнія два дзесяцігоддзі падзення ВУП у 2022 годзе эканоміка Беларусі перажывае бурны ўздым. Дзякуючы жорсткім адміністрацыйным мерам удалося знізіць інфляцыю да адназначных лічбаў і стабілізаваць абменны курс”, — адзначаецца ў справаздачы.

Разам з тым аналітыкі звяртаюць увагу, што “за макраэканамічнай стабільнасцю, якая намецілася, хаваюцца глыбока укаранелыя недахопы і залежнасць ад аднаго партнёра” — Расіі. У сярэднетэрміновай перспектыве чакаецца, што “тэмпы росту застануцца ніжэйшымі за патэнцыйныя, а ўнутраны попыт істотна скароціцца праз змяншэнне валютных паступленняў і прагназаванае ўзмацненне жорсткасці грашова-крэдытнай і бюджэтнай палітыкі”.

На фоне “высокага ўнутранага попыту і скарачэння знешняга гандлю” эксперты чакаюць, што тэмпы росту імпарту будуць перавышаць дынаміку павелічэння экспарту.

“У першым паўгоддзі 2023 года экспарт вырас на 8,6% дзякуючы попыту з боку Расіі і цэнам на сыравінныя тавары. Аднак на фоне росту рэальных даходаў насельніцтва значна павялічыўся імпарт (на 23%), што прывяло да скарачэння станоўчага сальда гандлёвага балансу”, — гаворыцца ў справаздачы.

Паводле прагнозаў СБ, па выніках 2023 года экспарт тавараў і паслуг вырасце на 10,5% (на 2,8% у 2024-м, 2,5% у 2025-м), імпарт тавараў і паслуг — на 14,8% (4,7% і 4,4%).

“За выключэннем галін, звязаных з расійскім экспартам (нафтавая прамысловасць, вытворчасць угнаенняў і машынабудаванне), прагназуецца запаволенне росту інвестыцый, паколькі эканоміка застаецца недастаткова развітай. На гэтым фоне пры абмежаваным патэнцыяле росту эканоміка можа перайсці на траекторыю, блізкую да нулявой”, — адзначаецца ў аглядзе. Удакладняецца, што “ў выніку санкцый знешняя пазіцыя краіны аказалася ўразлівай і ў значнай ступені залежала ад расійскіх крэдытаў”.

Да канца года Сусветны банк чакае стабілізацыю інфляцыі на ўзроўні 8,2%, па выніках 2024-га — 8,9% з паступовым зніжэннем да 7,2% да 2025 года “пры ўмове эфектыўнага падтрымання адміністрацыйных мер”.

“Зніжэнне знешняга попыту і цэн на тавары прывядзе да пагаршэння сальда плацёжнага балансу, што выкліча ціск на валюту”, — сцвярджаецца ў дакуменце.

Акрамя гэтага, эксперты прагназуюць “пагаршэнне фіскальных перспектыў: дэфіцыт бюджэту будзе абумоўлены імкненнем ўрада стымуляваць эканоміку і захоўваць працоўныя месцы”.

Эканоміка Беларусі, на думку СБ, “актыўна адаптуецца да санкцый, пракладваючы новыя гандлёвыя маршруты і аднаўляючы экспарт, у прыватнасці, калійных угнаенняў і нафтапрадуктаў, праз Расію, хоць і з падвышанымі лагістычнымі выдаткамі”.

“Падвышаная заклапочанасць пытаннямі бяспекі і геапалітычная напружанасць аказваюць дадатковы ціск на эканамічныя перспектывы, асабліва калі будуць уведзеныя дадатковыя санкцыі, напрыклад, закрыццё заходняй мяжы для праезду і перавозкі грузаў”, — падкрэсліваецца ў справаздачы.

Адзначаецца, што адаптыўная палітыка, якая працягваецца, “стварае пэўныя цяжкасці, патрабуючы ад Беларусі тонкага балансу паміж захаваннем сацыяльных выплат, заработнай платы, эканамічнай падтрымкі і агульнай эканамічнай стабілізацыяй”.

“У спалучэнні са зніжэннем рахунку бягучых аперацый і абменнага курсу, кантролем над цэнамі і абмежаваннямі на працоўную сілу” гэта стварае “рызыкі высокага інфляцыйнага ціску”, рэзюмуюць аўтары дакумента.