Заснаваны ў Беларусі распрацоўшчык гульняў Wargaming сабраў амаль 1,1 млн долараў на рэанімабілі для ўкраінскіх медыкаў
14 лістапада, Позірк. Распрацоўшчык камп’ютарных гульняў кампанія Wargaming, стваральнік папулярнай серыі World Of Tanks сабрала 1 млн 74 тыс. 940 долараў на рэанімабілі для ўкраінскіх медыкаў, паведаміў міністр па інавацыях, развіцці адукацыі, навукі і тэхналогій Украіны Міхаіл Фёдараў.
Паводле яго слоў, збор грошай быў абвешчаны ў кастрычніку, на працягу двух тыдняў да ініцыятывы далучыліся донары з 115 краін (большасць з Германіі, ЗША, Польшчы, Чэхіі і Вялікабрытаніі).
“Усе сродкі будуць пералічаныя праз United24 на закупку рэанімабіляў, якія будуць ратаваць жыццё тысячам украінцаў. Дзякуй Wargaming і ўсім, хто далучыўся да збору”, — адзначыў Фёдараў.
Кампанія Wargaming заснаваная ў 1998 годзе камандай беларускіх распрацоўшчыкаў на чале з мінчанінам Віктарам Кіслым.
7 ліпеня 2022 года кампаніі, якія належалі Wargaming у Беларусі і Расіі СТАА “Гейм Стрым” і ТАА “Леста” былі прададзеныя расійскаму бізнесмену Маліку Хатажаеву.
Раней, 4 красавіка мінулага года, Wargaming абвясціў аб спыненні працы ў Беларусі і Расіі.
“За апошнія тыдні Wargaming правяла стратэгічны агляд бізнес-аперацый па ўсім свеце, — гаварылася ў паведамленні на старонцы кампаніі ў дзелавой сацсетцы LinkedIn. — Кампанія вырашыла, што не будзе валодаць або кіраваць бізнэсам у Расіі і Беларусі і пакіне абедзве краіны”.
Штаб-кватэра Wargaming знаходзіцца ў Нікасіі (Кіпр), асноўны цэнтр распрацоўкі быў у Мінску. Таксама цэнтры распрацоўкі размешчаныя ва Украіне (Кіеў), Чэхіі (Прага), Фінляндыі (Хельсінкі), ЗША (Сіэтл, Чыкага, Балтымор, Осцін) і Аўстраліі (Сіднэй).
