У сейме Літвы не хапае галасоў для ўзмацнення санкцый супраць беларусаў — дэпутат Кашчунас
9 студзеня, Позірк. У сейме Літвы не хапае галасоў, каб уніфікаваць нацыянальныя санкцыі для грамадзян Беларусі з тымі абмежаваннямі, якія дзейнічаюць у дачыненні да расіян, вынікае з заявы старшыні парламенцкага Камітэта па нацыянальнай бяспецы і абароне (КНБА) Лаўрынаса Кашчунаса 8 студзеня ў эфіры тэлеканала TV3.
Сайт LRT нагадаў, што 4 снежня 2023 года адпаведны законапраект Кашчунас зарэгістраваў у сейме разам з калегам Аўдронюсам Ажубалісам, а таксама намеснікам старшыні парламента Паўлюсам Саўдаргасам. Прапанаваныя імі папраўкі да ўжо дзеючых санкцый прадугледжваюць абмежаванне выдачы пасведчання на жыхарства беларусам (за выключэннем высокакваліфікаваных работнікаў), але адначасова аблягчаюць умовы для атрымання нацыянальнай візы з гуманітарных меркаванняў.
Напрыканцы 2023 года сейм ухваліў, а прэзідэнт Гітанас Наўседа падпісаў папраўкі да закона аб прававым статусе замежнікаў, якія сярод іншага дазваляюць выдаваць беларусам, што прыбылі краіну пры пасярэдніцтве МЗС, пасведчанне на жыхарства на падставе гуманітарных прычын не на адзін, а на тры гады.
КНБА выступаў супраць гэтай прапановы.
Закон аб абмежавальных мерах, звязаны з парадкам уезду і легалізацыі ў Літве, набыцця нерухомасці і іншымі пытаннямі, быў прыняты ў красавіку 2023 года. На этапе разгляду дакумент быў значна змякчаны ў дачыненні да беларусаў, большасць санкцый закранула расіян.
Наўседа наклаў на закон вета і прапанаваў парламенту ўраўнаваць санкцыі для беларусаў і расіян. Сейм адхіліў вета і зацвердзіў дакумент без прапаноў кіраўніка дзяржавы. Палітык сваю пазіцыю не змяніў, але на восеньскую сесію парламента пытанне пра ўніфікацыю абмежавальных мер не вынес.
