Міністэрства аховы здароўя: У траіх з сямі шпіталізаваных з кішачным расстройствам школьнікаў выяўлена вірусная інфекцыя

11 студзеня, Позірк. У дзіцячую інфекцыйную клінічную бальніцу Мінска шпіталізавана сем вучняў сярэдняй школы № 165 з прыкметамі кішачнай інфекцыі, паведаміла прэс-служба Міністэрства аховы здароўя.

Усяго па меддапамогу з вечара 9 студзеня звярнуліся восем дзяцей ад 10 да 14 гадоў, адзін стацыянарнай меддапамозе не меў патрэбы. Стан здароўя пацыентаў у бальніцы стабільны, сярэдняй ступені цяжкасці, тэмпература ў дзяцей — 37,2-37,3 ° С. Яны ядуць і п’юць.

“У траіх пацвердзілася вірусная інфекцыя (у дваіх — ротавірус, у аднаго — наравірус), — паведаміў загадчык інфекцыйнага аддзялення № 3 (для кішачных інфекцый) Вадзім Лагацько. — Вынікі лабараторных даследаванняў паказалі, што гэта вірусная кішачная інфекцыя. Яна перадаецца бытавым шляхам — ад чалавека да чалавека — не праз ежу і не праз ваду”.

У сувязі са здарэннем, адзначаў раней Міністэрства аховы здароўя, у школе арганізавана “правядзенне санітарна-проціэпідэмічных мерапрыемстваў і эпідэміялагічнага расследавання”. Акрамя гэтага, “праводзіцца ацэнка арганізацыі харчавання, у тым ліку ўмоў прыгатавання і рэалізацыі страў, адабраны для лабараторных даследаванняў пробы гатовых страў і вады, абследаваны персанал харчаблока на кішачную групу інфекцый”.

Аб шпіталізацыі школьнікаў ведамства паведаміла напярэдадні. Першапачаткова гаворка ішла аб кішачнай інфекцыі. Падрабязнасці не раскрываліся.