У “спіс экстрэмістаў” унесена яшчэ 12 чалавек

9 лютага, Позірк. Міністэрства ўнутраных спраў 9 лютага ўнесла ў спіс “асоб, якія маюць дачыненне да экстрэмісцкай дзейнасці”, яшчэ 12 чалавек — цяпер у ім 3.765 прозвішчаў, сведчыць абноўлены дакумент на сайце ведамства.

З іх толькі пяцёра адбываюць пакаранне, усе яны прызнаныя палітвязнямі. Гэта Дзмітрый Пашын, Уладзімір Раманоўскі, Аляксандр Левін, Раман Зайцаў і Ілля Целічэнка.

Раманоўскі і Пашын прыгавораны да 2 гадоў пазбаўлення волі паводле арт. 368 Крымінальнага кодэкса (абраза прэзідэнта).

Левін прызнаны вінаватым паводле арт. 130 КК (распальванне расавай, нацыянальнай, рэлігійнай або іншай сацыяльнай варожасці), Зайцаў — паводле арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх), Целічэнка — паводле арт. 361⁴ (садзейнічанне экстрэмісцкай дзейнасці). Інфармацыі пра тое, якія рашэнні прынялі ў дачыненні да іх суды, няма.

Астатнія 7 чалавек, уключаныя ў “спіс экстрэмістаў”, знаходзяцца на волі, іх судзімасць не пагашана. Паводле інфармацыі МУС, гэтыя асобы былі асуджаныя паводле арт. 342, 368, 369 (абраза прадстаўніка ўлады) альбо 370 (знявага дзяржсімвалаў).

Праваабарончы цэнтр “Вясна” адзначае, што непагашаная судзімасць накладвае на чалавека шэраг абмежаванняў і ўражвае ў правах, у тым ліку ў праве на працу.

Згодна з заканадаўствам, фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.

Цягам пяці гадоў пасля выканання судовых рашэнняў людзі з гэтага пераліку не могуць займацца педагагічнай і выдавецкай дзейнасцю, быць на дзяржслужбе, карыстацца зброяй.