Ціханоўская чакае працягу шчыльнай супрацы з Фінляндыяй

12 лютага, Позірк. “Паспяховага і плённага” прэзідэнцкага тэрміна пажадала беларускі дэмакратычны лідар Святлана Ціханоўская Аляксандру Стубу, які перамог на выбарах у Фінляндыі.

На сваёй старонцы ў сацыяльнай сетцы Х палітык адзначыла, што чакае працягу “шчыльнай супрацы з Фінляндыяй” — “нязменным саюзнікам дэмакратычнай Беларусі і рашучым прыхільнікам” беларускага народа.

11 лютага Стуб атрымаў перамогу ў другім туры прэзідэнцкіх выбараў, абышоўшы свайго асноўнага саперніка — былога міністра замежных спраў Пека Хаавіста.

У 2008–2011 гадах Стуб узначальваў МЗС Фінляндыі, у 2011–2014 займаў пасаду міністра па справах Еўрасаюза і знешняга гандлю, 2014–2015 — прэм’ер-міністра, 2015–2016 — міністра фінансаў. З 2017 года быў намеснікам генеральнага дырэктара Еўрапейскага інвестыцыйнага банка.

Сёлета ў студзені Фінляндыя стала 24-й краінай, дзе з’явілася парламенцкая група “За дэмакратычную Беларусь”. Пра рашэнне стварыць гэтую групу фінскія ўлады паведамілі падчас візіту Ціханоўскай.

На сустрэчы з прэм’ер-міністрам Фінляндыі Анці Петэры Орпа дэмлідар падзякавала Хельсінкі за шматгадовую падтрымку беларускіх адукацыйных ініцыятыў, праваабарончай дзейнасці. Яна абмеркавала з кіраўніком урада “варыянты рэалізацыі культурных ініцыятыў, якія ўмацоўваюць беларускую ідэнтычнасць”, у тым ліку праз фінскія дыпламатычныя місіі.

У снежні 2022 года на перамовах з папярэднім прэм’ер-міністрам Фінляндыі Санай Марын Ціханоўская заклікала не зачыняць дзверы для беларусаў, якія шукаюць прытулку ў ЕС.