20 лютага, Позірк. У дачыненні да затрыманага ў пачатку студзеня пазаштатнага відэааператара з Магілёва Яўгена Глушкова распачалі крымінальную справу за супрацоўніцтва з медыярэсурсам 6tv.by, паведаміла Беларуская асацыяцыя журналістаў са спасылкай на праўладны інфармацыйны рэсурс.
У відэа, знятым сілавікамі, Глушкоў кажа, што з 2017 года супрацоўнічаў са згаданым медыя. Справа ўзбуджаная паводле арт. 3611 Крымінальнага кодэкса (стварэнне экстрэмісцкага фарміравання або ўдзел у ім)
Рашэннем КДБ ад 29 лістапада 2023 года 6tv.by прызнаны “экстрэмісцкім фарміраваннем”.
Глушкова ўтрымліваюць у магілёўскай турме № 4, 15 лютага праваабаронцы прызналі яго палітвязнем.
Яўген Глушкоў у 1990-я і 2000-я працаваў на гарадскім тэлебачанні, пасля гэтага супрацоўнічаў з некалькімі гарадскімі парталамі.
Пасля прэзідэнцкіх выбараў 2020 года беларускія ўлады пачалі кампанію па ліквідацыі і крыміналізацыі незалежных СМІ, якая працягваецца дагэтуль.
Магчымасці працаваць у нацыянальнай юрысдыкцыі былі пазбаўленыя дзясяткі рэспубліканскіх і рэгіянальных медыя. Многія з іх цяпер працуюць у эміграцыі.
Паводле звестак Беларускай асацыяцыі журналістаў, цяпер у няволі 34 прадстаўнікі СМІ.
