Беларусь гатовая “напоўніцу ўключыцца” ў працу ШАС — Алейнік

27 лютага, Позірк. Беларусь гатовая “напоўніцу ўключыцца” ў працу Шанхайскай арганізацыі супрацоўніцтва (ШАС), “напаўняючы структуру новым зместам і выступаючы з прапановамі і ініцыятывамі”, заявіў міністр замежных спраў Сяргей Алейнік 26 лютага ў Мінску на сустрэчы з намеснікам генсакратара ШАС Нурланам Ермекбаевым.

Паводле інфармацыі прэс-службы МЗС, кіраўнік беларускага знешнепалітычнага ведамства падзякаваў суразмоўцы за “падтрымку ў пытаннях далучэння” Беларусі да ШАС “у якасці паўнапраўнага члена”.

Адзначаецца, што бакі “абмяняліся думкамі па актуальных пытаннях узаемадзеяння і абмеркавалі будучыя мерапрыемствы ў рамках ШАС”.

Алейнік таксама падзякаваў Ермекбаеву, які ўзначальваў у Беларусі групу назіральнікаў ад ШАС на выбарах у Палату прадстаўнікоў і мясцовыя саветы дэпутатаў, за “за праведзеную <…> працу місіі”.

Беларусь інтэгруецца ў ШАС амаль 15 гадоў: у 2010 годзе атрымала статус партнёра арганізацыі, у 2015-м — назіральніка.

У ліпені 2022 года Мінск падаў заяўку на ўступленне ў ШАС. У верасні прэзідэнт Узбекістана Шаўкат Мірзіёеў паведаміў на саміце арганізацыі, што пачалася працэдура надання Беларусі статусу паўнапраўнага члена.

Пра тое, што Беларусь можа ўступіць у ШАС да наступнага саміту арганізацыі, які пройдзе ў Астане (Казахстан) у ліпені 2024 года, 4 ліпеня 2023 года паведаміў неафіцыйны тэлеграм-канал прэс-службы Аляксандра Лукашэнкі са спасылкай на Алейніка.

Шанхайская арганізацыя супрацоўніцтва была створана ў 2001 годзе. Дэкларацыю пра яе фармаванне падпісалі кіраўнікі Казахстана, Кітая, Кыргызстана, Расіі, Таджыкістана і Узбекістана. Пазней да арганізацыі далучыліся Індыя, Іран, Пакістан.