Зарэгістраваныя ў Беларусі прычэпы ды паўпрычэпы павінны пакінуць ЕС да 10 ліпеня

5 ліпеня, Позірк. Зарэгістраваныя ў Беларусі прычэпы ды паўпрычэпы, якія знаходзяцца ў краінах Еўрапейскага саюза, павінны быць вывезены з яго тэрыторыі да 10 ліпеня, паведамляе Мытны дэпартамент пры Міністэрстве фінансаў Літвы.

Гэта павінна быць зроблена незалежна ад краіны рэгістрацыі цягачоў, якія транспартуюць прычэпы і паўпрычэпы. Патрабаванне звязанае з новым пакетам санкцый ЕС у дачыненні да Беларусі.

Паводле інфармацыі літоўскай мытні, санкцыі пачалі дзейнічаць 1 ліпеня, аднак бізнесу далі 10 дзён, каб да іх адаптавацца.

29 чэрвеня Савет ЕС прыняў новыя абмежавальныя меры эканамічнага характару ў дачыненні да Беларусі ў сувязі з удзелам рэжыму Аляксандра Лукашэнкі ў расійскай агрэсіі супраць Украіны. Сярод іншага была пашырана забарона на перавозку грузаў аўтатранспартам па тэрыторыі ЕС прычэпамі і паўпрычэпамі з беларускай рэгістрацыяй, у тым ліку пры перавозцы грузавікамі, зарэгістраванымі не ў Беларусі.

Акрамя таго, каб мінімізаваць рызыку абыходу санкцый, зарэгістраваным у ЕС кампаніям, якія належаць беларускім фізічным або юрыдычным асобам на 25% або больш, “павінна быць забаронена станавіцца аўтатранспартным прадпрыемствам або перавозіць тавары аўтатранспартам у саюзе, у тым ліку транзітам”.