Статкевіч на сустрэчы з прадстаўнікамі ЕС назваў сітуацыю ў Беларусі “халоднай грамадзянскай вайной”
2 кастрычніка, Позірк. Пра сустрэчу з афіцыйнымі прадстаўнікамі Еўрасаюза ў Беларусі паведаміў у сваім тэлеграм-канале 2 кастрычніка палітык, грамадскі дзеяч, былы палітвязень Мікалай Статкевіч.
Паводле слоў Статкевіча, ён “скарыстаўся выпадкам, каб выказаць сваю падзяку кіруючым структурам ЕС за дапамогу Украіне і салідарнасць з паняволенымі краінамі рэгіёну”.
“Цяперашнія рэгіянальныя войны (абарончая вайна ва Украіне і халодная грамадзянская вайна ў нас) перш за ўсё з’яўляюцца войнамі за каштоўнасці, дзе сілы свабоды супрацьстаяць сілам тыраніі. У гэтых войнах вызначыцца не толькі лёс рэгіёна і кантынента, але і будучыня ўсёй планеты“, — адзначыў ён.
“Падтрымка з боку вольнага свету, у якой ЕС адыгрывае найбольш значную ролю, паказвае, што мы не самотныя ў сваёй барацьбе, што сілы свабоды ў свеце пераўзыходзяць сілы тыраніі. І што ў канчатковым выніку свабода пераможа рабства. Беларусь будзе вольнай!” — падкрэсліў Статкевіч.
Сустрэча прайшла ў Беларусі.
11 верасня 2025 года Статкевіч разам з яшчэ 51 вязнем быў выпушчаны на волю ў рамках здзелкі паміж адміністрацыяй прэзідэнта ЗША Дональда Трампа і Аляксандрам Лукашэнкам. Умовай быў выезд за мяжу. Вызваленых павезлі ў Літву, аднак Статкевіч адмовіўся выконваць умову Лукашэнкі. Некаторы час ён правёў паміж памежнымі пераходамі Каменны Лог (Беларусь) і Мядзінінкай (Літва), пасля чаго вярнуўся на беларускую тэрыторыю. Затым доўгі час яго лёс быў невядомы (ён быў вернуты ў няволю).
19 лютага 2026 года жонка Статкевіча Марына Адамовіч апублікавала інфармацыю, што яе муж знаходзіцца дома і аднаўляецца пасля інсульту.
20 лютага прэс-сакратар Лукашэнкі Наталля Эйсмант заявіла, што той прыняў рашэнне вызваліць Статкевіча “на просьбу сваякоў“. “Для пачатку хачу нагадаць, што рашэнне аб памілаванні Мікалая Статкевіча прэзідэнт прыняў ужо даўно“, — сказала яна тады.
Доўгі час у няволі Статкевіч правёў у інфармацыйнай ізаляцыі, неаднаразова змяшчаўся ў штрафны ізалятар, прынамсі паўгода правёў у адзіночнай камеры.
6 жніўня Статкевіч заявіў, што яго інсульт быў выкліканы адмовай у неабходных леках.
12 жніўня палітыку споўнілася 70 гадоў.
