Жыхар Віцебскага раёна абвінавачваецца ў нападзе на старшыню сельсавета з бейсбольнай бітай

2 кастрычніка, Позірк. У Віцебскім раёне 47-гадовы мужчына напаў з бейсбольнай бітай на старшыню аднаго з сельсаветаў, паведамляе мясцовае выданне “Віцебскія весці”.

Чыноўнік, як адзначаецца, разам з членамі агляднай камісіі прыехаў праверыць умовы пражывання 76-гадовага бацькі мужчыны.

Інцыдэнт адбыўся ў верасні. Удакладняецца, што камісія праводзіла “планавае абследаванне ўмоў пражывання пажылых грамадзян у адной з вёсак раёна”.

Са спасылкай на пракуратуру паведамляецца, што сын гаспадара дома стаў пагражаць старшыні сельсавета і “ужыў да яго фізічную сілу“ — паспрабаваў ударыць яго бейсбольнай бітай, а затым нанёс удар “у вобласць тулава“.

Узбуджана крымінальная справа. Мужчыну можа пагражаць да сямі гадоў пазбаўлення волі.

Аглядная камісія — спецыяльны міжведамасны орган прафілактыкі, які правярае жылыя дамы і кватэры грамадзян на прадмет бяспекі, умоў пражывання і інш.