Сяргеенка: Краіна знаходзіцца пад беспрэцэдэнтным санкцыйным ціскам

28 лютага, Позірк. Цалкам “дэградавала сістэма міжнароднай бяспекі, краіна знаходзіцца пад беспрэцэдэнтным санкцыйным ціскам”, заявіў кіраўнік Адміністрацыі прэзідэнта Ігар Сяргеенка 28 лютага на сустрэчы з супрацоўнікамі Беларускага інстытута стратэгічных даследаванняў (БІСД).

Паводле яго слоў, працягваюцца спробы ўмяшання ва ўнутраныя справы Беларусі звонку.

“Няпростае становішча складаецца ля нашых межаў. Дэструктыўныя рэсурсы актыўна распаўсюджваюць дэзінфармацыю, у якой простаму абывацелю складана разабрацца, ды і спецыялістам часам. Усё гэта робіцца для таго, каб дэстабілізаваць сітуацыю ў краіне”, — цытуюць Сяргеенку дзяржСМІ.

На фоне бесперапынных рэпрэсій у Беларусі, масавай палітычна матываванай эміграцыі Сяргеенка заявіў, што “беларускае грамадства сёння маналітнае і згуртаванае”, гэта паказалі вынікі мінулых выбараў.

“Даследаванні паказваюць, што нашыя грамадзяне падтрымліваюць курс дзяржавы, курс прэзідэнта. Так, ёсць праблемныя пытанні, якія выказваюцца па тых ці іншых напрамках. Яны ўлічваюцца ў працы пры прыняцці кіраўніцкіх рашэнняў”, — сказаў Сяргеенка.

Звяртаючыся да супрацоўнікаў БІСД, Сяргеенка заклікаў актыўна ўдзельнічаць у выпрацоўцы інструментаў супрацьдзеяння санкцыйнай палітыцы, быць больш актыўнымі ў міжнароднай сферы.

Інстытут, лічыць ён, павінен стаць “кузняй кадраў для дзяржаўных органаў і Адміністрацыі прэзідэнта”.

БІСД створаны па ініцыятыве Аляксандра Лукашэнкі ў лютым 2019 года “ў мэтах інфармацыйна-аналітычнага забеспячэння дзейнасці дзяржаўных органаў і службовых асоб па стратэгічных напрамках знешняй і ўнутранай палітыкі”.

Назва інстытута цалкам супадае з недзяржаўным Беларускім інстытутам стратэгічных даследаванняў (BISS), які працаваў на той момант у Беларусі.