У дэмсілаў атрымліваецца забіраць палітычную прастору ў рэжыму Лукашэнкі, лічыць Ціханоўская
Святлана Ціханоўская і прэм'ер-міністр Балгарыі Мікалай Дзенкаў (Сафія, сакавік 2024 года)
8 сакавіка, Позірк. У дэмакратычных сіл атрымліваецца забіраць палітычную прастору ў рэжыму Аляксандра Лукашэнкі, заявіла на брыфінгу 8 сакавіка ў Вільнюсе кіраўніца Аб’яднанага пераходнага кабінета (АПК) Святлана Ціханоўская ў адказ на просьбу “Позірку” пракаментаваць рэакцыю пасольства Беларусі ў Балгарыі на яе нядаўні візіт у Сафію.
“Адна з нашых задач [палягае ў тым, каб] забіраць палітычную прастору ў рэжыму Лукашэнкі, усталёўваць стасункі з краінамі, якія былі больш-менш лаяльныя да Лукашэнкі ўсе гэтыя гады, і ў нас гэта атрымліваецца, — сказала палітык. — Малдова, Румынія, цяпер Балгарыя. Вядома, гэта (візіты дэмсілаў у гэтыя краіны. — “Позірк“.) удар па Лукашэнку. Наша задача, каб людзі ў гэтых краінах і кіраўніцтва ведалі, што адбываецца [у Беларусі]”.
“Насамрэч я бачу, што вельмі мала ведаюць пра беларусаў, і беларусы вельмі мала ведаюць пра іншыя краіны. Мы павінны ўмацоўваць або ўсталёўваць новыя адносіны паміж нашымі краінамі. Таму я заклікаю ўсіх нашых беларусаў, каб яны наладжвалі адносіны з арганізацыямі — моладзевымі, па розных напрамках — у іншых краінах, каб нас чулі і бачылі”, — сказала кіраўніца АПК.
На пытанне, з якімі дзяржавамі, на кантакты з якімі разлічвае афіцыйны Мінск, маглі б усталяваць стасункі дэмсілы, Ціханоўская адказала: “У нас шмат кантактаў з краінамі постсавецкай прасторы, большасць з іх непублічныя”.
“Мы павінны паважаць адносіны і ўспрыманне беларускіх дэмакратычных сіл, але яны (кантакты. — “Позірк“.) ёсць. Я не буду называць гэтыя краіны, але іх шмат, больш, чым мы паказваем на публіку”, — падкрэсліла яна.
“Што тычыцца Арменіі, то гэта непублічна”, — адказала палітык на ўдакладненне “Позірку” аб кантактах з прадстаўнікамі гэтай дзяржавы.
Кажучы пра тое, ці можа Беларусь на наступнай сустрэчы ў рамках парламенцкай асамблеі АБСЕ прадстаўляць не дэлегацыя ад афіцыйнага Мінска, як гэта было ў лютым, а група ад дэмакратычных сіл, кіраўніца АПК адказала: “Мы заклікаем да гэтага, паглядзім, як будзе”.
Пасольства Беларусі ў Балгарыі назвала Ціханоўскую "злачынцай" на фоне яе візіту ў Сафію
7 сакавіка, Позірк. Пасольства Беларусі ў Балгарыі, каментуючы візіт у Сафію дэмакратычнага лідара Святланы Ціханоўскай, назвала яе на сваёй старонцы ў сацсетцы Х (былы "Твітар") "злачынцай". "Лепшая падтрымка Беларусі — захаванне асноўных прынцыпаў міжнароднага права, у тым ліку неўмяшанне ва …
Перад выступам Ціханоўскай на камітэце ПА АБСЕ дэлегацыя ПП НС пакінула залу — Вячорка
22 лютага, Позірк. Перад выступам Святланы Ціханоўскай на камітэце Парламенцкай асамблеі АБСЕ па пытаннях дэмакратыі, правах чалавека і гуманітарных пытаннях 22 лютага ў Вене дэлегацыя Палаты прадстаўнікоў Нацыянальнага сходу Беларусі пакінула залу, паведаміў "Позірку" галоўны дарадца дэмакратычнага лідара Франак Вячорка. …