Пастаўкі курыных яек з Беларусі ў РФ выраслі ў 2,7 раза — Рассельгаснагляд

11 сакавіка, Позірк. З пачатку 2024 года пастаўкі курыных яек з Беларусі ў Рассію выраслі ў 2,7 раза ў параўнанні з аналагічным перыядам 2023 года і склалі 148 млн штук, заявіла 11 сакавіка Федэральная служба ветэрынарнага і фітасанітарнага нагляду РФ (Рассельгаснагляд).

“З Турцыі з пачатку 2024 года імпартавана 12,3 млн яек. <…>. У 2023 годзе з Беларусі ў Расію за названы перыяд было адгружана 53,5 млн яек”, — паведамляе наглядная служба.

9 студзеня Рассельгаснагляд паведаміў, што пастаўкі курыных яек з Беларусі ў Расію 1–9 студзеня выраслі “амаль удвая” ў параўнанні з аналагічным перыядам мінулага года — “да 11,7 млн штук”.

Заяўлялася, што 1–9 студзеня 2023 года з Беларусі ў РФ было ўвезена 6,3 млн курыных яек. Павелічэнне склала 85,7%.

Усяго ў 2023 годзе ў Расію было пастаўлена 510,8 млн курыных яек беларускай вытворчасці.

“На расійскі рынак на працягу чатырох апошніх гадоў паступіла ў сярэднім больш за 630 млн штук харчовага яйка ў год”, — удакладнілі ў расійскім ведамстве.

З дэфіцытам курыных яек Расія сутыкнулася ў снежні мінулага года. Праз гэта па выніках года яны выраслі ў кошце амаль на 50%.

29 снежня падчас наведвання ГЦ “Першы нацыянальны гандлёвы дом” Аляксандр Лукашэнка даручыў генеральнаму дырэктару Віцебскай бройлернай птушкафабрыкі Ганне Норкус “перакінуць Пуціну” курыных яек.