ВУП Беларусі за студзень — люты вырас на 4% (дапоўнена)

18 сакавіка, Позірк. Аб’ём валавога ўнутранага прадукту ў Беларусі за студзень — люты 2024 года ў наяўных цэнах склаў 34,5 млрд рублёў. У супастаўных цэнах да ўзроўню таго ж перыяду 2023-га ён вырас на 4%, паведамляе Нацыянальны статыстычны камітэт.

Індэкс-дэфлятар ВУП за гэты перыяд адносна аналагічнага перыяду папярэдняга года склаў 109,1%.

У 2023 годзе ВУП вырас на 3,9%, у 2022-м — знізіўся на 4,7%, у 2021-м эканоміка вырасла на 2,3%, у 2020-м — скарацілася на 0,9%,

Згодна з важнейшымі прагнознымі (дэ-факта планавымі) параметрамі развіцця краіны на 2024 год, прырост ВУП павінен скласці 3,8%.

Акадэмічны дырэктар даследчага цэнтра BEROC Леў Львоўскі адзначаў у інтэрв’ю “Позірку”, што “ўлады і на 2024 год паставілі мэта росту ВУП на 3,8%”, але для мінулага і цяперашняга гадоў гэта “зусім розныя лічбы”. “Летась у нас быў аднаўленчы рост пасля падзення на 4,7% у 2022-м. Аднаўляцца заўсёды прасцей, чым расці. Але нават гэтае аднаўленне падвяло эканоміку да стану перагрэву”, — перакананы эканаміст.

Ён падкрэсліў, што ў краіне вельмі нізкае беспрацоўе, а гэта значыць, што прадпрыемствы вымушаны наймаць не кампетэнтнага работніка, а “таго, каго могуць знайсці”.