21 сакавіка, Позірк. Урад Эстоніі не падтрымаў ініцыяваны парламенцкай фракцыяй “Айчына” законапраект, які пазбаўляе грамадзян Беларусі і РФ права голасу на мясцовых выбарах, паведамляе выданне Postimees.
Удакладняецца, што з рэкамендацыяй не прымаць закон выступілі Міністэрствы юстыцыі і ўнутраных спраў. Паводле ацэнкі Мінюста, дакумент “не прапарцыйны ў дачыненні да заяўленай мэты”.
Законапраект замацоўвае права голасу на мясцовых выбарах для “грамадзян трэціх краін, з якімі ў Эстоніі заключаныя двухбаковыя дамовы”, яны павінны пражываць у краіне “на падставе доўгатэрміновага або пастаяннага віду на жыхарства”. Пры гэтым анулюецца магчымасць удзелу ў выбарах “грамадзян Расіі і Беларусі, якія ўдзельнічаюць у вайсковай агрэсіі” супраць Украіны.
Згодна з дзеючым законам, правам голасу на выбарах органаў мясцовага самакіравання валодаюць грамадзяне Эстоніі і ЕС, а таксама замежнікі, якія пражываюць у краіне на падставе доўгатэрміновага або пастаяннага ВНЖ.
