Белстат: Запасы прампрадукцыі на складах у гадавым вымярэнні павялічыліся на 12%
Фота мае ілюстрацыйны характар
24 кастрычніка, Позірк. Па выніках студзеня — верасня 2023 года на складах было “замарожана” прамысловай прадукцыі на 8 млрд 186,096 млн рублёў — на 12% больш, чым за тыя ж дзевяць месяцаў 2022-га (7 млрд 311,31 млн), сведчаць даныя Нацыянальнага статыстычнага камітэта.
На пачатку года на складах захоўвалася прадукцыя на 8 млрд 670,32 млн рублёў. За тры кварталы аб’ём складскіх запасаў у вартасным выражэнні зменшыўся на 480,224 млн рублёў (-5,9%).
Разам з тым у студзені — жніўні запасы ацэньваліся ў 8 млрд 154,137 млн рублёў, такім чынам за апошні месяц рост склаў 31,959 млн (+0,4%).
На прэс-канферэнцыі 18 верасня ў Мінску першы намеснік міністра прамысловасці Аляксандр Агароднікаў заявіў, што беларуская прадукцыя “з’яўляецца складанатэхнічнай”, яе “няпроста рэалізаваць”, “трэба прадаваць з сэрвісным суправаджэннем, з навучаннем персаналу сэрвісу”.
“Склад — гэта дрэнна з пункту гледжання замарожаных актываў, з другога боку — гэта магчымасць рэалізаваць сваю прадукцыю патэнцыйнаму спажыўцу”, — сказаў чыноўнік.
Паводле даных Белстата, у студзені — верасні 2023 года аб’ём прамысловай вытворчасці ў наяўных цэнах склаў 136,1 млрд рублёў — на 8,1% больш, чым за той жа перыяд 2022-га.
