23 сакавіка, Позірк. Карабель “Саюз МС-25” з экіпажам, у склад якога ўваходзіць беларуска Марына Васілеўская, стартаваў з касмадрома Байканур 23 сакавіка ў 15:36 паводле мінскага часу.
Праз тры хвіліны пасля запуску аддзялілася першая прыступка ракеты-носьбіта, праз дзесяць — другая, неўзабаве пасля гэтага — трэцяя.
Стыкоўка з Міжнароднай касмічнай станцыяй запланаваная на 18:10 25 сакавіка.
На борце акрамя Васілеўскай камандзір экіпажа Алег Навіцкі (РФ, ураджэнец Беларусі) і астранаўт НАСА Трэйсі Дайсан (ЗША).
Запуск павінен быў адбыцца 21 сакавіка ў 16:21, але здарылася “аўтаматычная адмена пуску”. Разгледзеўшы прычыны няштатнай сітуацыі, у выніку якой была “перапынена працэдура старту ракеты касмічнага прызначэння”, спецкамісія вырашыла правесці паўторны запуск карабля 23 сакавіка.
Згодна з першапачатковымі планамі, пасля кароткай экспедыцыі Навіцкі і Васілеўская павінны былі вярнуцца на Зямлю на караблі “Саюз МС-24” з астранаўтам Лорел О’Хара (Дайсан мусіла працягнуць палёт на МКС у складзе касмічнай экспедыцыі МКС-70/МКС-71 да верасня).
Праз перанос запуску была змененая і дата вяртання. Цяпер чакаецца, што Васілеўская вернецца на Зямлю 6 красавіка.
