“Наш дом”: Літва пачала працэс дэпартацыі мужа Карач

25 сакавіка, Позірк. Дэпартамент міграцыі Літвы распачаў працэс дэпартацыі ў Беларусь беларускага журналіста Алега Баршчэўскага, мужа праваабаронцы Вольгі Карач, паведамляецца на сайце арганізацыі “Наш дом”.

Заяўляецца, што ў Беларусі “Алегу пагражае да сямі гадоў турмы як рэдактару сайта nash-dom.info, прызнанаму ў Беларусі экстрэмісцкім, які, у сваю чаргу, належыць беларускай праваабарончай арганізацыі “Наш дом”, прызнанай у Беларусі “экстрэмісцкім фарміраваннем”.

Сцвярджаецца, што ў Літве “ідзе палітычны пераслед праваабаронцы Вольгі Карач і яе сям’і за яе праваабарончую дзейнасць па абароне беларусаў”, Баршчэўскаму “адмоўлена ў палітычным прытулку на падставе, што яму нібыта ў Беларусі нічога не пагражае”.

“Наш дом” паведамляе, што пры гэтым “раней іншым работнікам арганізацыі Літва дала прытулак без праблем”.

18 жніўня 2023 года Карач заявіла, што Вільнюс адмовіўся даць ёй палітычны прытулак. Праз некалькі дзён інфармагенцтва BNS паведаміла, што Дэпартамент дзяржбяспекі Літвы прыняў адпаведнае рашэнне на падставе інфармацыі аб супрацоўніцтве беларускі з расійскімі спецслужбамі.

Намеснік дырэктара Дэпартамента міграцыі МУС Літвы Люцыя Войшніс адзначыла, што Карач “з гуманітарных меркаванняў быў прадастаўлены часовы від на жыхарства тэрмінам на адзін год”.

У студзені 2024 года галоўны адміністрацыйны суд Літвы пакінуў у сіле рашэнне ранейшых інстанцый аб адмове ў даванні прытулку Карач.