За чатыры гады колькасць насельніцтва Беларусі зменшылася больш чым на 250 тыс. (дапоўнена)

28 сакавіка, Позірк. Колькасць насельніцтва Беларусі на 1 студзеня 2024 года склала 9 млн 155 тыс. 978 чалавек, сведчаць дадзеныя Нацыянальнага статыстычнага камітэта.

На пачатак 2023 года ў краіне паводле афіцыйных даных пражывала 9 млн 200 тыс.617 чалавек.

Такім чынам, за год колькасць жыхароў зменшылася на 44.639 чалавек (-0,49%).

Ва ўсіх абласцях і сталіцы зафіксаванае зніжэнне. У Мінску — на 0,13% (з 1.995.471 да 1.992.862), Мінскай вобласці — 0,12% (з 1.462.021 да 1.460.289), Гомельскай — 0,66% (з 1.347.469 да 1.338.617), Брэсцкай — 0,52% (з 1.315.405 да 1.308.569), Віцебскай — 0,92% (з 1.091.948 да 1.081.911), Гродзенскай — 0,61% (з 998.600 да 992.556), Магілёўскай — 0,86% (з 989.703 да 981.174).

На 1 студзеня 2022-га ў Беларусі пражывала 9 млн 255 тыс. 524 чалавек, 2021-га — 9 млн 349 тыс. 645, 2020-га — 9 млн 410 тыс. 259.

Са статыстыкі вынікае, што з пачатку 2020 года колькасць жыхароў скарацілася на 254 тыс. 281.

У сваіх разліках Белстат улічвае павелічэнне або памяншэнне колькасці насельніцтва асобных тэрыторый у выніку “змены іх адміністрацыйна-тэрытарыяльнага ўладкавання”.

Звесткі аб колькасці насельніцтва прыводзяцца па пастаянным насельніцтве. Да пастаяннага насельніцтва адносяцца асобы, якія пражываюць у Беларусі адзін год і больш.

З 2020 года Белстат не публікуе даныя аб нараджальнасці і смяротнасці. Пра іх можна меркаваць толькі па ўскоснай інфармацыі.

На хвалі рэпрэсій, якімі ўлады адрэагавалі на масавыя пратэсты пасля выбараў, з краіны з’ехала вялікая колькасць грамадзян. Паводле неафіцыйных звестак, лік ідзе на сотні тысяч чалавек.