У Гродне адкрылі “рускі дом” — чацвёрты ў Беларусі

2 красавіка, Позірк. Адкрыццё ў Гродне Расійскага цэнтра навукі і культуры (РЦНК) адлюстроўвае “глыбокую сімпатыю і павагу да гараджан” і горада, а таксама спрыяе ўмацаванню сувязяў дзвюх краін, у тым ліку “на ўзроўні рэгіёнаў”. Пра гэта заявіў 2 красавіка на цырымоніі адкрыцця аб’екта пасол РФ у Беларусі Барыс Грызлоў.

Паводле яго слоў, якія прыводзіць прэс-служба расійскага пасольства, РЦНК у Гродне стане “адным з цэнтраў прыцягнення для жыхароў і шматлікіх гасцей гэтага цудоўнага горада”.

Паведамляецца, што ў адкрыцці прынялі ўдзел саветнік-пасланнік пасольства Уладзімір Ваньке, кіраўнік Федэральнага агенцтва па справах СНД, суайчыннікаў, якія пражываюць за мяжой, і па міжнародным гуманітарным супрацоўніцтве Яўген Прымакоў, генеральны консул РФ у Гродне Феадосій Уладышэўскі і намеснік старшыні Гродзенскага аблвыканкама Віталь Нявера.

31 студзеня Прымакоў паведамляў, што аддзяленне размешчанага ў Мінску РЦНК, можа адкрыцца ў Гродне да “Дня яднання народаў Беларусі і Расіі” 2 красавіка. Паводле яго слоў, на гэта атрыманае дзяржаўнае бюджэтнае фінансаванне РФ.

Аддзяленне ў Гродне стала чацвёртым у Беларусі. Раней РЦНК былі адкрытыя ў Мінску, Брэсце і Гомелі.

Альтэрнатыўная назва расійскіх цэнтраў навукі і культуры — “рускі дом”. Дзейнічаюць у шэрагу краін як прадстаўніцтва агенцтва Рассупрацоўніцтва МЗС РФ, дэкларуючы мэты прасоўвання рускай мовы, расійскай навукі і культуры.

Рассупрацоўніцтва пазіцыянуе сябе як вядучае расійскае агенцтва, галоўная місія якога — “узмацненне гуманітарнага ўплыву Расіі ў свеце”. Арганізацыя прадстаўленая ў 62 краінах свету 73 прадстаўніцтвамі.

Прадстаўніцтвы займаюцца прапагандай палітыкі Крамля і распаўсюджваннем наратываў, якія апраўдваюць расійскую агрэсію ва Украіне.

Рассупрацоўніцтва выступіла партнёрам фотавыставы пра “злачынствы кіеўскага рэжыму”, якая была адкрытая ў студзені ў Мінску ў філіяле Расійскага дзяржаўнага сацыяльнага ўніверсітэта.