У ЕС заявілі пра гатоўнасць рэагаваць на пагрозы, якія зыходзяць ад “самазванца” Лукашэнкі

2 красавіка, Позірк. Еўрасаюз не вядзе вайну, але рыхтуецца супрацьстаяць пагрозам, якія зыходзяць ад Беларусі і Расіі, заявіў 2 красавіка прадстаўнік замежнапалітычнай службы ЕС Петэр Стана.

Еўрачыноўнік, словы якога прыводзіць выданне Euobserver, назваў Лукашэнку “самазванцам, які скраў выбары”, і “саўдзельнікам злачынстваў, учыненых Расіяй супраць Украіны”. Ён адзначыў, што “ЕС прымае меры засцярогі з першага дня пачатку расійскай агрэсіі”.

“Мы працуем над тым, каб Еўропа была найлепшым чынам абсталяваная для супрацьстаяння ўсім пагрозам, якія зыходзяць ад такіх людзей, як Лукашэнка ці Пуцін”, — сказаў прадстаўнік ЕС.

Паводле слоў Стана, Еўрасаюз можа быць небяспечны толькі для тых, хто “пагарджае дэмакратыяй, правамі чалавека, правамі грамадзяніна і міжнародным правам”.

“Ніхто не павінен баяцца ЕС, акрамя людзей, якія падрываюць міжнародныя нормы і дэмакратыю, як Лукашэнка”, — падсумаваў Стана.

Падчас візіту ў Гродна 2 красавіка Аляксандр Лукашэнка заявіў: “Мы рыхтуемся да вайны, я пра гэта кажу адкрыта”. “Хочаш міру — рыхтуйся да вайны” — не я гэта прыдумаў. Гэта вельмі правільна сказана”, — сказаў ён.

Паводле яго слоў, у краіне вядзецца “неабходная падрыхтоўка адпаведных падраздзяленняў”, у войскі пастаўляюцца розныя віды ўзбраенняў і тэхнікі. “Калі адтуль (з Захаду. — “Позірк”.) хтосьці падвывае і нас крытыкуе, ведайце: мы робім правільна. Калі там нас пачнуць хваліць — бяда”, — сказаў Лукашэнка.

Ён заявіў у чарговы раз, што Беларусь нікому не пагражае: “Мы не хочам чужой зямлі. Нам гэтую дай бог апрацаваць”.

24 лютага 2022 года Расія развязала поўнамаштабную вайну супраць Украіны, у якой афіцыйны Мінск падтрымлівае Крэмль.