Амбасадар Круты аб інтэграцыі з РФ: Мы ўсім усё даказалі, не ўпалі, нас не разарвала

3 красавіка, Позірк. Беларусь і Расія “разам супрацьстаяць санкцыйнаму ціску, геапалітычнай напружанасці, якая існуе на нашым кантыненце”, заявіў амбасадар Беларусі ў Расіі Дзмітрый Круты ў відэавіншаванні з Днём яднання народаў Беларусі і Расіі.

Відэа размешчана ў тэлеграм-канале дыпмісіі.

“Мы з усім справімся. Мы моцныя, мы ўсім усё даказалі. Мы не ўпалі, нас не разарвала… Не разарвалі нейкія сацыяльныя ўзрушэнні, нас не ўдалося раз’яднаць. У нас цудоўнае супрацоўніцтва. Нашы лідары, як родныя браты, задаюць тон усяму нашаму парадку”, — сказаў Круты.

Урады дзвюх краін “распрацавалі цудоўныя планы, наша задача іх толькі выканаць”, адзначыў ён.

Паводле словаў Крутога, ён верыць, што на працягу трох-пяці гадоў Дзень яднання стане выходным днём, “нашы прэзідэнты прымуць такое рашэнне”.

2 красавіка 1996 года прэзідэнт РФ Барыс Ельцын і Аляксандр Лукашэнка падпісалі дамову “Аб утварэнні Супольнасці Расіі і Беларусі”, якая пазней трансфармавалася ў Саюзную дзяржаву.

З таго часу ўлады адзначаюць Дзень яднання народаў Беларусі і Расіі.