За перыяд анамальнай спякоты ў Беларусі абнавілася 147 тэмпературных рэкордаў

Апублікавана на адкрытай версіі “Позірку” 4 ліпеня 2026 года ў 10:58

3 ліпеня, Позірк. Восем тэмпературных рэкордаў абнавілася на беларускіх метэастанцыях 2 ліпеня, у апошні дзень перыяду анамальнай спякоты, які пачаўся 27 чэрвеня, вынікае з праведзенага “Позіркам“ аналізу аператыўных і даступных архіўных даных Белгідрамета (па 48 станцыях). Усе экстрэмумы зарэгістраваныя на паўднёвым усходзе краіны.

Самая высокая тэмпература мінулым днём адзначаная ў Лельчыцах — 33,5 градуса (ранейшы экстрэмум — 31,2 у 2012 годзе) і Мазыры — 33,4 (32,7 у 2016-м).

Перапісаныя рэкорды таксама ў Гомелі — 32,9 (31,3 у 2016-м), Акцябрскім — 32,7 (32,3 у 2016-м), Жлобіне — 32,5 (31,2 у 2012-м), Касцюковічах — 32,1 (31 у 1999-м), Брагіне — 31,9 (31,2 у 2016-м) і Слаўгарадзе — 31,3 (29,5 у 2012).

Абсалютны рэкорд дня выстаяў (34,1 градуса 2 ліпеня 2016 года ў Стоўбцах).

Усяго з 27 чэрвеня па 2 ліпеня, паводле падлікаў “Позірку”, абнавілася 147 тэмпературных рэкордаў: на ўзроўні асобных метэастанцый — 99 рэкордаў дня, 26 рэкордаў месяца, 15 гістарычных рэкордаў; на нацыянальным узроўні — 4 рэкорды дня, 2 рэкорды месяца (чэрвень), 1 абсалютны (40,4 градуса 29 чэрвеня ў Пінску).

На 9 ліпеня Белгідрамет запланаваў прэс-канферэнцыю на тэму надвор’я ў першай палове 2026 года.