У Бялыніцкім раёне 22-гадовы матацыкліст загінуў ад сутыкнення з грузавіком КамАЗ
8 жніўня, Позірк. 22-гадовы матацыкліст загінуў ранкам 8 жніўня ў дарожна-транспартным здарэнні ў Бялыніцкім раёне, паведамляе прэс-служба УУС Магілёўскага аблвыканкама.
Паводле інфармацыі ведамства, 60-гадовы кіроўца аўтамабіля КамАЗ з паўпрычэпам, які ехаў у раёне вёскі Ермалавічы, “пры павароце налева не саступіў дарогу матацыклу “Хонда”, які рухаўся ў сустрэчным кірунку”.
Матацыкліст сутыкненне не перажыў.
Абласная ДАІ заклікала кіроўцаў “быць пільнымі пры здзяйсненні манеўраў, улічваць дарожную абстаноўку і адлегласць да транспарту, які набліжаецца“.
Як паведамляў “Позірк“, позна ўвечары 31 ліпеня ў Брэсце сутыкнуліся матацыкл і мапед — загінула тры чалавекі. Удар быў настолькі моцным, што цела пасажыркі матацыкла разарвала на часткі.
