45-гадоваму жыхару Салігорска пагражае да 15 гадоў зняволення за распаўсюд наркотыкаў
9 жніўня, Позірк. Аб затрыманні 45-гадовага жыхара Салігорска (Мінская вобласць) паведамляе Міністэрства ўнутраных спраў.
Супрацоўнікі ведамства, як адзначаецца, атрымалі інфармацыю, што мужчына “можа быць датычны да распаўсюджвання забароненых рэчываў”. “Пры правядзенні далейшых мерапрыемстваў звесткі пацвердзіліся”, — гаворыцца ў паведамленні.
Затрыманне падазраванага праведзена пры сілавой падтрымцы байцоў асобнага атрада спецпрызначэння “Беркут” МУС.
“Па месцы жыхарства і ў абсталяваных ім схованках прама каля дома выяўлена і канфіскавана звыш 600 г асабліва небяспечнага псіхатропнага рэчыва Альфа-PVP”, — адзначае МУС.
Распачатая крымінальная справа за незаконны абарот наркотыкаў з мэтай збыту. Заяўляецца, што затрыманаму пагражае да 15 гадоў пазбаўлення волі.
Паводле даных Вярхоўнага суда, за першыя шэсць месяцаў 2026 года за звязаныя з наркотыкамі злачынствы асуджана 1.039 чалавек, з іх 666 — за “незаконны абарот без мэты збыту” (ч. 1 арт. 328 КК), 314 — за “незаконны абарот з мэтай збыту” (ч. 2–5 арт. 328 КК).
Як паведамляў “Позірк”, паводле даных Вярхоўнага суда, у 2025 годзе колькасць асуджаных па “наркатычных” артыкулах Крымінальнага кодэкса павялічылася на 7,9% у параўнанні з 2024 годам.
За здзяйсненне злачынстваў, звязаных з незаконным абаротам наркотыкаў, летась было асуджана 2.253 чалавекі — 8% усіх асуджаных (у 2024 годзе — 2.088; 6,6%).
З іх 2.077, або 92,2%, прызнаныя вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.
