Кіраўнік МЗС Украіны: Спадзяемся, Беларусь стане свабоднай краінай, будучыню якой пачне вызначаць народ, а не Масква
9 жніўня, Позірк. Шэсць гадоў таму беларускія грамадзяне “выразна прадэманстравалі сваю волю да дэмакратычных перамен і сваё права вызначаць будучыню сваёй краіны”, заявіў на сваёй старонцы ў сацсетцы Х міністр замежных спраў Украіны Андрэй Сібіга з нагоды гадавіны прэзідэнцкіх выбараў 2020-га.
“Іх выбар быў сустрэты рэпрэсіямі, — канстатаваў кіраўнік украінскага МЗС. — Аднак гады ціску, турэмнага зняволення і вымушанай спасылкі не знішчылі імкненне беларусаў да свабоды, дэмакратыі і суверэнітэту”.
Украіна, паводле слоў Сібігі, праводзіць “выразнае адрозненне паміж беларускім народам і рэжымам Лукашэнкі, які нясе адказнасць за развязванне Расіяй агрэсіўнай вайны”.
“Мы цэнім многіх беларусаў, якія падтрымалі Украіну і выступілі супраць расійскай агрэсіі”, — падкрэсліў ён.
“Мы спадзяемся, што аднойчы Беларусь стане свабоднай, незалежнай, дэмакратычнай і еўрапейскай краінай, дзе будучыню краіны будзе вызначаць яе народ, а не Масква. Такая Беларусь умацавала б бяспеку ўсяго нашага рэгіёну”, — дадаў кіраўнік украінскай дыпламатыі.
Украіна, адзначыў ён, працягне цеснае ўзаемадзеянне са Святланай Ціханоўскай і “ўсімі беларусамі, якія хочуць жыць у свабоднай і еўрапейскай Беларусі”.
“Свабодная Беларусь належыць свабоднай Еўропе”, — рэзюмаваў Сібіга.
Старшыня Еўрапарламента Роберта Метсола напісала ў сацсетцы “Трэдс”, што Беларусь “будзе вольнай”.
“Праз шэсць гадоў пасля таго, як людзі ўсталі на абарону сваёй будучыні, іх галасы так і не ўдалося прымусіць замаўчаць. Еўропа падтрымлівае іх і працягне дамагацца таго, каб у Беларусі перамаглі свабода, незалежнасць СМІ і воля яе народа”, — падкрэсліла Метсола.
Член міжфракцыйнай групы Вярхоўнай Рады Украіны “За дэмакратычную Беларусь” Аляксей Ганчарэнка заявіў у сваім тэлеграм-канале, што шэсць гадоў таму Лукашэнка “скраў у беларусаў іх выбар”.
“Пасля сфальсіфікаваных выбараў ён кінуў супраць уласнага народа сілавікоў, катаванні, рэпрэсіі і турмы. А сам паступова ператварыў Беларусь у плацдарм для расійскай агрэсіі і інструмент Крамля”, — падкрэсліў Ганчарэнка.
“Але Лукашэнка — гэта не Беларусь”, — дадаў ён.
Беларусь, паводле слоў украінскага дэпутата, гэта “сотні тысяч людзей, якія ў 2020 годзе выйшлі за свабоду”, гэта “палітычныя зняволеныя, дэмакратычныя сілы і беларусы, якія сёння ваююць супраць расійскага імперыялізму побач з украінцамі”.
“Лёс Беларусі — папярэджанне і для нас: так выглядае будучыня дзяржавы, калі дазволіць дыктатуры і Крамлю атрымаць перамогу. Мы падтрымліваем свабодную Беларусь”, — напісаў Ганчарэнка.
Гл. таксама:
Еўрасаюз і дэмакратычныя краіны выказваюць салідарнасць з беларусамі з нагоды гадавіны выбараў-2020
