8 жніўня, Позірк. Электразабеспячэнне ва ўсіх паселішчах Беларусі, што пацярпелі ад непагадзі, адноўленае да 23:00 8 жніўня, паведамляе прэс-служба Міністэрства энергетыкі.
Моцны навальнічны фронт са шквалістым ветрам накрыў Беларусь увечары 6-га — ўначы 7 жніўня.
Паводле інфармацыі Мінэнерга, адключэнне электрычнасці было зафіксаванае як сама меней у 494 населеных пунктах.
“Аварыйна-аднаўленчыя работы вяліся бесперапынна, у тым ліку на цяжкадаступных участках, — гаворыцца ў паведамленні. — Для ліквідацыі наступстваў стыхіі былі задзейнічаныя каля 370 аварыйных брыгад, 478 адзінак тэхнікі і 30 дызель-генератарных установак. Цяпер энергетыкi працягваюць адпрацоўваць адзінкавыя заяўкі спажыўцоў у сетках 0,4 кВ”.
“Энергетыкі працягваюць працу ва ўзмоцненым рэжыме, вядуць маніторынг стану электрасеткавага комплексу і гатовыя аператыўна рэагаваць на магчымыя змены абстаноўкі”, — запэўніла Мінэнерга.
