Лукашэнка зацікаўлены ў “нарошчванні супрацоўніцтва” з Сінгапурам

9 жніўня, Позірк. Аляксандр Лукашэнка 9 жніўня павіншаваў з Днём Незалежнасці прэзідэнта Сінгапура Тармана Шанмугаратнама.

Скарыстаўшыся “гэтай урачыстай нагодай”, віншавальнік, як паведамляе яго прэс-служба, выказаў зацікаўленасць “у нарошчванні ўзаемавыгаднага супрацоўніцтва ў сферах гандлю і інвестыцый, харчовай бяспекі і прамысловай кааперацыі”.

Таксама Лукашэнка разлічвае на “пашырэнне міжпарламенцкіх, дзелавых і гуманітарных абменаў”.

Дыпламатычныя адносіны паміж краінамі ўстаноўленыя 12 жніўня 1992 года.

Актуальных звестак па ўзаемным гандлі ў адкрытым доступе няма. Паводле звестак МЗС, узаемны тавараабарот у 2021 годзе склаў 42,9 млн долараў (беларускі экспарт — 28,3 млн, сінгапурскія пастаўкі — 14,6 млн, дадатнае сальда — 13,7 млн).

Паміж Сінгапурам і Еўразійскім эканамічным саюзам (ЕАЭС), членам якога з’яўляецца Беларусь, дзейнічае рэжым свабоднага гандлю.