У Беларусі рэпрэсавана больш за 20 замежнікаў — праваабаронцы

5 красавіка, Позірк. Беларускія ўлады пераследуюць па палітычных матывах не толькі грамадзян сваёй краіны — “пад рэпрэсіўны каток” трапляюць таксама замежнікі, гаворыцца ў справаздачы праваабарончага цэнтра “Вясна”.

Паводле даных праваабаронцаў, сёння ў зняволенні па “палітычных” прыгаворах знаходзяцца грамадзяне Украіны, Польшчы, Расіі, Латвіі, Казахстана і Узбекістана.

“Дакладная лічба невядомая, але іх лік ідзе на трэці дзясятак, — адзначаецца ў справаздачы. — Замежнікаў пераследуюць за ўдзел у акцыях пратэсту, каментары, перадачу інфармацыі незалежным СМІ і сваякам за мяжу”.

Раней некалькіх грамадзян Украіны асудзілі паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

Праваабаронцы звяртаюць увагу, што за “абразлівыя” каментары ў сацсетках пра Аляксандра Лукашэнку асудзілі 69-гадовага ўраджэнца Украіны (мае беларускае грамадзянства), а за “садзейнічанне экстрэмісцкай дзейнасці” да 2,5 года пазбаўлення волі прыгавораная грамадзянка Украіны.

З пачаткам поўнамаштабнай вайны ва Украіне ўзмацніўся ціск на ўкраінцаў у Беларусі — іх пераследуюць па падазрэннях у супрацоўніцтве з украінскімі спецслужбамі, падкрэсліваецца ў дакладзе.

Паводле арт. 358 (шпіянаж) і 358¹ (агентурная дзейнасць) КК асуджана не менш за сем грамадзян Украіны: Сяргей Бойка, Людміла Ганчарэнка, Міхаіл Сталярчук, Дзмітрый Гудзік, Павел Купрыенка, Андрэй Шмай, Наталля Захаранка.

Пад вартай утрымліваецца фігурант справы аб дыверсіі на аэрадроме ў Мачулішчах (Мінскі раён) Мікалай Швец з Украіны. Тады ў выніку атакі беспілотнікаў быў выведзены са строю расійскі вайсковы самалёт А-50.

Увосень 2023 года КДБ паведаміў пра затрыманне ў Беларусі шасці чалавек паводле абвінавачвання ў “падрыхтоўцы тэрактаў”, сярод іх — два ўкраінцы (Вячаслаў Бародзій і Іван Ліхалат).

Па абвінавачванні ў тэрарызме затрымалі траіх грамадзян суседняй краіны. Сяргею і Паўлу Кабарчукам інкрымінуюць нелегальны пераход мяжы і дастаўку выбухоўкі, а жыхарцы Маларыцкага раёна (Брэсцкая вобласць) Лідзіі Грук — фатаграфаванне прыгранічных аб’ектаў.

У 2023 годзе паводле арт. 358¹ КК асуджаная 57-гадовая грамадзянка Латвіі Ала Сакаленка, у 2022-м паводле арт. 369 КК (абраза прадстаўніка ўлады) — 45-гадовы грамадзянін гэтай жа балтыйскай краіны Дзмітрый Сіўко.

“Адной з самых гучных спраў пераследу грамадзян Расіі” названы пераслед Сафіі Сапегі — сяброўкі былога апазіцыйнага блогера Рамана Пратасевіча. Пасля затрымання ў траўні 2021 года ў выніку прымусовай пасадкі самалёта авіякампаніі Ryanair у Мінску яна была прыгавораная да 6 гадоў зняволення, памілаваная ў чэрвені 2023-га.

Па “справе Ціханоўскага” на 16 гадоў пазбаўлення волі асуджаны расіянін Дзмітрый Папоў, яго суайчыннік Андрэй Новікаў, прыгавораны да 2,5 года зняволення, адбыў тэрмін пакарання, выйшаў на волю і дэпартаваны ў РФ.

Да 11 гадоў калоніі паводле арт. 361 (заклікі да дзеянняў, накіраваных на прычыненне шкоды нацыянальнай бяспецы Беларусі) і 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) КК прыгавораны затрыманы ў траўні 2021-га расіянін Ягор Дуднікаў, да 9 гадоў паводле арт. 342 і 218 КК (наўмыснае знішчэнне або пашкоджанне маёмасці, учыненае агульнанебяспечным чынам або з прычыненнем буйной шкоды) — Максім Матырка.

Па “справе падрыхтоўкі дыверсій у Гродне” паводле арт. 289 КК (акт тэрарызму) судзяць Аляксея Кулікова.

59-гадовага Сяргея Ботвіча асудзілі паводле арт. 358 і 358¹ КК (прысуд невядомы).

Праваабаронцам вядома аб трох асуджаных па палітычных матывах грамадзянах Польшчы: паводле арт. 358¹ КК — Ежы Жывалеўскім, паводле арт. 368 (абраза прэзідэнта) і 269 КК — Роберце Тампале, паводле арт. 358 і 358¹ КК — Томашы Бярозе.

Паводле арт. 368 КК асуджаны 62-гадовы грамадзянін Узбекістана Ільдар Таухітаў, а аводле арт. 342 КК — грамадзянін гэтай жа краіны Віктар Новік з жонкай.

Жыхара Петрыкава (Гомельская вобласць), які мае грамадзянства Казахстана, Віталя Скударнова асудзілі паводле арт.130, 369 і 368 КК.

На раніцу 5 красавіка ў Беларусі 1.400 чалавек, якіх праваабарончая супольнасць прызнае палітвязнямі.