Музыкаў Nizkiz прыгаварылі да 2,5 года абмежавання волі па месцы жыхарства

12 красавіка, Позірк. Музыкі гурта Nizkiz Сяргей Кульша, Аляксандр Ільін і Дзмітрый Халяўкін прыгавораныя да 2,5 года абмежавання волі без накіравання ў папраўчую ўстанову адкрытага тыпу (ПУАТ), паведамляе праваабарончы тэлеграм-канал MAYDAY.TEAM.

Рашэнне прынятае суддзёй Кастрычніцкага раёна Мінска Аленай Жывіцай.

Музыкі прызнаныя вінаватымі паводле арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

12 красавіка яны былі ўключаныя МУС у “спіс экстрэмістаў”.

Музыкаў Nizkiz затрымалі 5 студзеня 2024 года. Некалькімі днямі пазней, 8 студзеня, іх судзілі паводле арт.19.11 КаАП (распаўсюджванне, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць). Рашэнне па той справе, якую разглядала суддзя Вікторыя Палякова, невядомае.

10 студзеня паводле гэтага ж артыкула другі раз асудзілі вакаліста гурта Ільіна. Рашэнне таксама невядомае.

Пазней стала вядома, што музыкаў перавялі ў мінскі следчы ізалятар на вул. Валадарскага ў сувязі з крымінальнай справай.

У сюжэце, які выйшаў на беларускім тэлебачанні пасля затрымання ўдзельнікаў Nizkiz, сцвярджалася, што “музыкі пасля падзей 2020 года пакінулі Беларусь і вось вырашылі вярнуцца” (паводле інфармацыі праваабаронцаў, яны жылі ў краіне, перыядычна выязджаючы на гастролі). Пры гэтым што канкрэтна ставіцца ў віну затрыманым, не ўдакладнялася.

Чацвёрты ўдзельнік гурта гітарыст Леанід Несцярук знаходзіцца на волі. Ён жыве ў Варшаве.

19 лютага праваабаронцы прызналі ўдзельнікаў групы палітвязнямі.

Індзі-рок-гурт Nizkiz заснаваны ў 2008 годзе ў Магілёве. Да цяперашняга часу выпусціла пяць студыйных альбомаў. Уладальнік шэрагу музычных узнагарод, сярод іншага калектыў адзначаны прэміяй “Радыё АНТ” за 2012 год у намінацыі “Дэбют года”.