Літва і Польшча пачалі сумесныя вайсковыя вучэнні ў Сувалкскім калідоры

21 красавіка, Позірк. Узброеныя сілы Літвы і Польшчы 21 красавіка пачалі сумесныя тактычныя вучэнні “Адважны грыфон” у раёне Сувалкскага калідора, паведамляе інфармагенцтва BNS.

У вучэннях, якія будуць праходзіць да 26 красавіка, таксама возьмуць удзел падраздзяленні войскаў ЗША і Партугаліі, адзначае партал lrt.lt.

Літва задзейнічае ў мерапрыемствах 1,5 тыс. вайскоўцаў пяхотнай брыгады “Жэмайція” ім. Яна Хадкевіча. Падчас вучэнняў будуць апрабаваныя “абарончыя сцэнары ў адпаведнасці з двухбаковым літоўска-польскім “Аршанскім планам”, гаворыцца ў паведамленні.

Падкрэсліваецца, што гэты план падрыхтаваны ў 2022 годзе, частка яго засакрэчаная.

Пры гэтым, як паведамляе выданне, у Літве працягваюцца вучэнні “Удар мяча”, арганізаваныя Узброенымі сіламі ЗША.

Падчас праверкі боегатоўнасці арміі 26 сакавіка ў Ашмянскім раёне (Гродзенская вобласць) недалёка ад мяжы з Літвой Аляксандр Лукашэнка пацікавіўся ў камандуючага войскамі Паўночна-Заходняга аператыўнага камандавання Аляксандра Навуменкі: “А колькі ў нас (увесь час яны вякаюць пра гэты Сувалкскі калідор) тут кіламетраў да Расіі, да Калінінградскай вобласці, ад нашых межаў?”

“42 кіламетры. <…> Калі наўпрост, а калі па мяжы, то каля 90”, — адказаў яму военачальнік. На гэта Лукашэнка адрэагаваў: “Практычна нічога. Дарма яны сябе так паводзяць. Але ў гэты момант табе давядзецца супрацьстаяць балтыйскім рэспублікам”.

29 сакавіка Міністэрства замежных спраў Літвы ўручыла часоваму паверанаму ў справах Беларусі Яраславу Хмылю ноту пратэсту ў сувязі з гэтымі выказваннямі Лукашэнкі.

Прэс-служба знешнепалітычнага ведамства паведаміла, што 26 сакавіка ён “неабгрунтавана папракнуў Літву ў ваенных пагрозах Беларусі, якія нібыта зыходзяць ад яе, намякнуў на неабароненасць Сувалкскага калідора і загадаў падрыхтаваць беларускае войска да магчымай канфрантацыі з краінамі Балтыі і Польшчай”.

Сувалкскім калідорам называюць вузкі ўчастак на тэрыторыі Польшчы і Літвы. Заходнія эксперты і вайскоўцы лічаць гэта месца “слабым звяном”, паколькі заняцце калідора беларускімі і расійскімі войскамі не толькі адрэжа краіны Балтыі ад астатніх дзяржаў Еўрасаюза на сушы, але і злучыць Гродзенскую вобласць Беларусі з расійскім эксклавам — Калінінградскай вобласцю, што дазволіць арганізаваць хуткую прамую пастаўку туды ўзбраенняў і ваеннай тэхнікі.