На мандаты новага складу Кардынацыйнай рады прэтэндуе 280 чалавек

23 красавіка, Позірк. На выбары новага складу Каардынацыйнай рады (КС) пададзена 13 выбарчых спісаў, якія ў агульнай складанасці налічваюць 280 чалавек. Цяпер яны верыфікуюцца.

У выбарчую камісію паступілі спісы:

• “Каманда Латушкі і Рух “За свабоду” — 47 чалавек (лідар спіса — намеснік кіраўніцы Аб’яднанага пераходнага кабінета Павел Латушка),
• “Еўрапейскі выбар” — 37 (старшы палітычны дарадца дэмакратычнага лідара Святланы Ціханоўскай Аляксандр Дабравольскі),
• “Блок Пракоп’ева — Ягорава” — 35 (адзін з заснавальнікаў беларускага добраахвотніцкага палка “Пагоня”, былы рэстаратар Вадзім Пракоп’еў),
• “Салідарнасць” — 21 (прадстаўнік групы хрысціянскіх дэмакратаў Георгій Дзмітрук; аб’яднаны спіс з партыяй “Народная грамада”),
• “Воля” — 20 (намеснік камандзіра палка імя Кастуся Каліноўскага Вадзім Кабанчук),
• “Закон і Правапарадак” — 20 (кіраўнік арганізацыі ByPol Аляксандр Азараў),
• “Незалежныя беларусы” — 17 (відэабалогер Максім Шабуцкі),
• “Краіна для жыцця” — 17 (кіраўнік аднайменнага грамадскага руху Віталь Савюк),
• “Моладзевы наступ” — 15 (актывістка “Моладзевага блока” Лізавета Пракопчык),
• “Наша справа” — 14 (палітолаг Роза Турарбекава),
• “Хопіць баяцца” — 14 (аўтар аднайменнага медыяпраекта, відэаблогер Таццяна Мартынава),
• “Голас дыяспар — Адзінства па-над межамі” — 13 (праваабаронца Раман Кісляк),
• “За годнасць беларусак” — 10 (кіраўнік віленскага аддзялення “Руху беларускіх нацыяналістаў” Яраслаў Грыгор’еў).

Агітацыя пройдзе з 25 красавіка па 25 траўня, галасаванне — 25–28 траўня. Чакаецца, што першыя вынікі будуць абвешчаныя не пазней за наступны дзень пасля заканчэння галасавання.

На падачу і разгляд скаргаў закладзены перыяд з 29 траўня па 8 чэрвеня, у гэты ж дзень будуць абвешчаныя канчатковыя вынікі выбараў.

Першае пасяджэнне Каардынацыйнай рады трэцяга склікання чакаецца 15 чэрвеня.