Ураджэнец Асеціі Караеў заявіў, што змяняльнасць улады супярэчыць беларускаму менталітэту

3 траўня, Позірк. Былы міністр унутраных спраў, памочнік Аляксандра Лукашэнкі па Гродзенскай вобласці Юрый Караеў у эфіры тэлеканала “Гродна+” заявіў, што беларускаму грамадству не падыходзіць мадэль заходняй дэмакратыі.

“Розныя некамерцыйныя арганізацыі <…> гадамі выхоўвалі ў нашым народзе, спрабавалі пасеяць вось гэтыя паняцці дэмакратыі — свабода асобы, змяняльнасць абавязковая ўлады. Гэта значыць, заходні ўзор жыцця, заходні ўзор дэмакратыі. Чатыры гады [знаходжання ва ўладзе], максімум восем… І лідар краіны павінен абавязкова сысці. Дый паняцця лідара няма, ёсць наняты нейкі кіраўнік”, — сказаў Караеў.

Паводле яго слоў, у Беларусі “ўсё інакш складалася”.

“[Заходняя дэмакратыя] супярэчыць цалкам нашаму савецкаму, славянскаму, вось гэтаму еўраазіяцкаму духу і менталітэту”, — адзначыў чыноўнік.

Ён сцвярджае, што беларусы іншы “шлях намацалі”, на чале з “моцным кіраўніком, якога выбраў народ, які даўжэй працягвае кіраваць і будаваць”.

Маючы на ўвазе Лукашэнку, Караеў заявіў, што “ён не часовы, як у іх”.

57-гадовы Караеў нарадзіўся ў Паўночнай Асеціі (цяпер Расія), у Беларусі застаўся пасля службы ў войску ў 80-х гадах мінулага стагоддзя.

Як адказны за рэпрэсіі 2020 года ўключаны ў санкцыйныя спісы ЕС, ЗША, Вялікабрытаніі, Канады, Швейцарыі, Албаніі, Ісландыі, Ліхтэнштэйна, Нарвегіі, Паўночнай Македоніі, Чарнагорыі, Украіны.

Аляксандр Лукашэнка знаходзіцца ва ўладзе Беларусі з 1994 года.

З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.