16 траўня, Позірк. Затрыманыя 8 траўня пробашч шумілінскай парафіі касцёла Маці Божай Фацімскай (Віцебская вобласць) Анджэй Юхневіч і ксёндз Павел Лемех адбываюць адміністрацыйныя арышты: 15 і 10 сутак адпаведна.
Пра гэты гаворыцца ў паведамленні Курыі Віцебскай дыяцэзіі, апублікаванай на партале catholicnews.by.
Паводле якога артыкула арыштаваныя святары, не ўдакладняецца.
Курыя заклікала вернікаў “памятаць аб гэтых святарах у малітве, каб Дух Святы даў ім неабходныя сілы і ўзмацніў у гэтым выпрабаванні”.
Затрыманне Юхневіча і Лемеха адбылося пасля сустрэчы святароў і кансэкраваных асоб Віцебскай дыяцэзіі, якая прайшла 8 траўня. Падставы затрымання былі невядомыя, але пазней з’явілася інфармацыя, што яно звязана з нібыта “падрыўной дзейнасцю супраць беларускай дзяржавы”.
Згодна з маніторынгам ініцыятывы “Хрысціянская візія”, з 2020 года пераслед зазналі не менш як 26 прадстаўнікоў Рымска-каталіцкага касцёла ў Беларусі.
Місіянеры Аблаты з’яўляюцца каталіцкім Ордэнам з двухсотгадовай гісторыяй. У свеце працуюе каля 3.500 аблатаў, сярод іх ёсць 2 кардыналы, 7 арцыбіскупаў і 36 біскупаў.
